Mandat, reglement, handlingsplan og historie

Forskinga ved SVT siktar mot god balanse mellom eksternfinansiert og grunnløyvingsfinansiert forsking og tett samanheng mellom forskingsaktiviteten og undervisninga.

Senteret har ei forskargruppe i vitskapsteori som omfattar heile den vitskaplege staben. Som eit ledd i å vidareutvikle forskingsaktiviteten ved SVT vil senteret etablere ei prøveordning med mindre tematiske undergrupper i tillegg til den overordna forskargruppa i vitskapsteori. 

Den ordinære undervisinga ved SVT går i hovudsak føre seg på tre nivå:

1. Ph.d.-programma på enkeltfakultet ved UiB.
2. Masterprogrammet i berekraft ved UiB
3. VIT200-emna "Sentrale spørsmål i vitskaps og samfunn" (Danningsemna)
4. Ph.d.-emne på prosjekt som AFINO (Ansvarlig Forsking og Innovasjon i Norge) og ARINA (Ansvarlig og Radikal Innovasjon: Nettverk og læringsArena).
5. Undervisning i andre studieprogram ved UiB i emna vitskapsteori og etikk.

Masterprogrammet i berekraft har funne si form, samtidig som tilpassing og utvikling av emne, organisering og pedagogisk innretning er naudsynt.

For å sikre god bruk av senterets undervisingsressursar i masterprogrammet, vil SVT i komande periode søkje å involvere større delar av den vitskaplege staben i programmet, mellom anna ved å etablere eit oversyn over tilgjengelege tema for masteroppgåver i berekraftprogrammet som staben ved SVT kan rettleie. 

SVT underviser i vitskapsteori og etikk ved ph.d.-programma på Det humanistiske fakultet, Det samfunnsvitskaplege fakultet, Det psykologiske fakultet, Det matematisk-naturvitskaplege fakultet, og er involvert vitskapsteoriemne på Det juridiske fakultet, og Det medisinske fakultet, samt i utvikling av undervisning i vitskapsteori for kunstnarleg forsking/utviklingsarbeid med relevans for Fakultet for kunst, musikk og design.

SVT gir også undervisning i vitskapsteori og etikk i eit utval av studieprogram ved UiB i tillegg til dei som er nemnde ovanfor. 

På forskarnivå har SVT undervisning og rettleiing i mange former som til dømes innlegg om vitskapsteori og etikk i instituttseminar og på andre nivå i organisasjonen, samt rettleiing og rådgjeving i samband med utvikling av forskingssøknader og større forskingsprosjekt (BOA-teamet).

SVT har som mål å utvikle fleire modular som kan brukast på tvers av fakulteta i ph.d.-emna i vitskapsteori og etikk. 

SVT vil vidareutvikle samarbeidet om forskarutdanninga i vitskapsteori og etikk ved Det juridiske fakultet.

Formidling og kommunikasjon utgjer ein stor del av dei faktiske arbeidsoppgåvene ved senteret. Dette skjer gjennom foredrag, bidrag i tradisjonelle og nye medier, høyringssvar i relevante saker, deltaking i komitear og utval, og rådgjeving. 

For å betre den indre kommunikasjonsflyten vil senteret som ei forsøksordning etablere ein nyhendekanal for tilsette.

SVT har kontorplassar for staben spreidd over to adresser, Harald Hårfagres gate 1 (HH1) og Parkveien 9 (Pv9). For å leggje til rette for fagleg og sosialt fellesskap trass i spreidd lokalisering vil SVT

• Leggje til rette for fleire fagleg-sosiale møteplassar, slik som t.d. felles lunsjdag, suppelunsj etc.
• Oppgradere fellesareala i kjellaretasjen for å gjere dei trivelegare og høvelegare som kombinert lunsj- og møterom.

Senteret har tilsette i mange ulike stillingstypar, frå forskings- og undervisningsstillingar, via reine forskarstillingar, til postdoktorar, ph.d.-kandidatar, vitskaplege assistentar, i tillegg til administrativ stab.

Når det gjeld karriereutvikling vil senteret leggje vekt på å gje stipendiatar og postdoktorar høve til å få undervisingserfaring som kvalifiserer for framtidig karriere. For stillingar der finansieringa ikkje inkluderer pliktarbeid vil senteret, når økonomien tillet det og arbeidsoppgåver er tilgjengelege, leggje til rette for å opparbeide undervisingserfaring.

Dei reine forskarstillingane har etter regelverket normalt ikkje høve til å delta i den ordinære undervisinga. Dette representerer eit vesentleg hinder i karriereutviklinga for denne gruppa som dermed misser høvet til å kvalifisere seg for ordinære forskings- og undervisingsstillingar. 

EU-kommisjonen har tildelt Universitetet i Bergen statusen «HR Excellence in Research» (HREiR) basert på "Charter and Code for researchers". HREIR forpliktar UiB til å arbeide for å fremje forskarane sine karrierer. SVT vil setje denne problemstillinga høgt på dagsorden.

SVT har dei siste 15 åra meir enn dobla talet på tilsette, dels knytt til eksternfinansierte prosjekt, dels knytt til nye undervisingsoppgåver.

Senterets styringsmodell er basert på tilsett senterleiar og eit rådgjevande stabsmøte. Denne modellen har fungert godt, særleg då senteret hadde monaleg færre tilsette arbeidsoppgåver enn i dag.

SVT vil ta initiativ til å utgreie alternativ styringsmodell med leiargruppe, eksempelvis med forskingskoordinator og undervisingskoordinator i tillegg til senterleiar.

Stabsmøtet er det rådgjevande organet for senterleiar og er samansett av alle som er tilsette ved, eller har sin arbeidsplass ved senteret. Etter at senteret har fått programansvaret for masterprogrammet i berekraft vil det vere naturleg at også masterstudentane blir representerte i stabsmøtet.

SVT har ei dobbel forankring ved UiB, administrativt til HF, og fagleg til Forskningsutvalet ved UiB. For at denne doble forankringa skal fungere godt trengst ein gjennomgang og samordning av mandatet for SVT og det sentrale forskingsutvalet.