Samfunnsplanlegging og rolleforståing i komplekse plansituasjonar

Denne vidareutdanninga er for tilsette som er planleggarar, eller har planrelaterte arbeidsoppgåver knytt til samfunnsutvikling, i norske kommunar og fylkeskommunar. Emnet skal bidra til å tette gapet mellom kva kommunar og fylkeskommunar treng av kompetanse innan samfunnsplanlegging, og den kompetansen tilsette med planrelaterte oppgåver knytt til samfunnsutvikling faktisk har. Sentralt i utdanningstilbodet står samhandlingskompetanse og prosess- og rolleforståing i komplekse plansituasjonar. Studentane lærer å

• Handtere komplekse og uoversiktlege plansituasjonar
• Kjenne att  planproblem og løysningar
• Analysere og forstå komplekse plansituasjonar
• Utvikle handlingskompetanse..
• Integrere praktisk og teoretisk planleggingskompetanse.

Studentane møter eksempel på praksisar og oppdaterte perspektiv på stadutvikling og planlegginga si rolle og rom for handling, som strekk seg utover det tradisjonelle plansystemets prosessar, prosedyrar og rammer. Emnet byggjer på geografiske og planteoretiske perspektiv og empiriske  døme, inkludert studentane sine erfaringsbaserte kunnskapar. Undervisning og læring skjer tett på ulike plankontekstar slik dei spelar seg ut i norske kommunar og regionar i dag. Emnet er delt inn i fire tematiske modular:

1. Komplekse problem og motstridande mål - kva nå?;
2. Spenningar og dilemma;
3. Strategisk samfunns- og næringsplanlegging
4. Nye perspektiv for å tenke og handle i planlegging.

Studenten skal ved avslutta emne ha følgjande læringsutbyte: 

Kunnskap

Studenten

• kan drøfte, identifisere og analysere ulike komplekse plansituasjonar og skilje dei frå kvarandre.
• kan drøfte nyare utvikling i samfunnsplanlegging og ulike kritiske tilnærmingar og teoriar om planlegging og framtid.
• kan nytte ulike metodar for deltaking i planprosessar.
• kan vurdere og kritisere ulike teoriar og praktiske grep for å jobbe med spenningar og konfliktar i planlegging.
• kan opparbeide innsikt og bedømme ulike tilnærmingar til strategiske grep for ein meir berekraftig samfunns- og næringsplanlegging.

Ferdigheiter

Studenten

• kan kombinere relevant teori og kunnskap for å analysere handlingsrom i eigen plankvardag.
• kan foreslå og grunngje ulike strategiar og intervensjonar i eigen plankvardag for å handtere spenning, konflikt, deltaking og framtid.
• kan setje seg inn i og diskutere ulike komplekse plansituasjonar ulike planleggjarar står i.
• kan gjere nytte av ulike eksempel og metodar for deltaking.
• kan vise korleis kunnskap, framtid og konflikt legg til rette for ulike tilnærmingar og utfordringar i planprosessen.

Generell kompetanse

Studenten

• kan arbeide sjølvstendig med praktisk og teoretisk problemløysing.
• kan presentere og diskutere (skriftleg og munnleg) faglege problemstillingar og analysar i emnet.