Godkjend klinikk, hospitering HUS og Tannlegevakta

Mål:

I dette emnet blir det lagt vekt på at studenten kan leggje fram ein stor grad av fagleg tryggleik, evne til diagnostikk og behandling og evner å integrere kunnskap og ferdigheiter frå alle fag og disiplinar som det er gått gjennom i tidlegare semester. Med bakgrunn i tidlegare tileigna kunnskap, evner og haldningar, kan studenten undersøkje og behandle dei vanlegaste, og nokre av dei meir avanserte, tilstandane i munnhola. Studenten skal sjå dei ulike faga i samanheng og kunne prioritere og foreslå ein behandlingssekvens ut i frå behovet til pasienten. Evne til å ta ansvar for å følgje opp pasienten på ein ansvarsfull og profesjonell måte, vil bli tillagd stor vekt.

Innhald:

Emnet byggjer på element som er introdusert tidlegare i studiet, og det blir vist til både dei meir overordna teoretiske og praktisk/kliniske læringsmål for odontologistudiet og til dei enkelte emna. Emnet omfattar alle dei disiplinane/emna det har vore undervist i tidlegare i studiet og som det har vore ei evaluering i, og den kliniske treninga held fram i dette emnet. Tidlegare bestått klinisk trening til og med 9. semester, er ein føresetnad for å kunne starte på 10. semester.

Etter gjennomført kurs har studenten følgjande læringsutbyte definert i kunnskap, ferdigheiter og generell kompetanse:

Kunnskap:

Studenten:

• har inngåande kunnskap om symptombilde, kliniske funn, utgreiing og behandling innan dei vanlegaste orale problemstillingane.
• har kunnskap til aktuelle tilleggsundersøkingar, til dømes CT, MR og laboratorieundersøkingar.
• har kunnskap om korleis sjukdom i kroppen kan påverke den orale helsa.
• har kjennskap til hovudgrupper av legemiddel og deira verknadsmekanismar og korleis desse kan påverke oral sjukdom og terapival.
• har kunnskap om spesielle behov hos eldre og hospitaliserte pasientar.
• har kunnskap om klinisk bruk, biologiske aspekt og handtering av odontologiske biomateriale.
• har kunnskap om mikrobiologi som er av betydning for tann- og munnhelse
• har kjennskap til arbeid i Den offentlege tannhelsetenesta og meir avanserte behandlingar i Spesialisthelsetenesta.
• har kunnskap om Folketrygdas regelverk for refusjon av utgifter til tannbehandling.
• har kunnskap til Lov om tannhelsetenesta

Ferdigheiter:

Studenten:

• tar sjølvstendig opp anamnese og skriv gode, strukturerte pasientjournalar for alle pasientgrupper.
• utfører dei fleste diagnostiske undersøkingar som ein forventar skal kunne utførast av ferdige tannlegar
• vurderer behovet for røntgenundersøkingar og gjennomfører vanlege intraorale røntgenopptak.
• vurderer behovet for tilleggsundersøkingar.
• gjennomfører grunnleggjande profylaktiske og terapeutiske tiltak for pasienten på ein sjølvstendig måte.
• meistrar ulike former for akuttbehandling og akutte situasjonar som kan oppstå i samband med tannbehandling, samt kunne vurdere behov for videre tilvising/hospitalisering
• nyttar dei vanlegaste moderne, vitskaplege aksepterte profylaktiske og terapeutiske tiltaka, materiale og teknikkar.
• evaluerer gjennomført behandling og kan gi ei objektiv vurdering av prognose.
• vurderer behov for etterkontrollar/etterbehandling og planlegg vedlikehaldsfase.
• forsikrar seg om pasienten har rett på refusjon/stønad frå offentleg eller privat instans.
• kan presentere og forsvare utført behandling på pasientar som har vært behandla i studentklinikken

Generell kompetanse:

Studenten:

• samarbeider med tannpleier, tannhelsesekretær og anna helsepersonell.
• viser etisk og profesjonell åtferd mot pasientar, pårørande og kollegaer.
• erkjenner eigne faglege avgrensingar og tilvisar pasienten der det er naudsynt med spesialkompetanse og/eller med tilvising til lege/ sjukehus.
• handlar i samsvar med lovverk, prosedyrar og etiske retningslinjer.