Film- og TV-produksjon (bachelor)

Frammøte: Studiestart er måndag 12. august.

Det er obligatorisk oppmøte på studieprogrammøtet denne dagen for å ikkje miste studieplassen din. Ta kontakt med studieveileder.mcb@uib.no dersom du ikkje kan møte.

Program: Her finn du program for studiestarten.

Bli klar som student: Ny student-siden.

Studiet er akademisk forankra med ein teoretisk del der du lærer å analysere og vurdere ulike typar produksjonar. Du lærer om sjangrar, filmatiske verkemiddel og film- og TV-historie. Samtidig får du på dette studiet praktiske handverksmessige ferdigheiter som er relevante for eit breitt spekter av audiovisuelle produksjonar, frå kortfilm til webserie til studioproduksjon til dokumentar til intervju.

Studiet er lokalisert i Media City Bergen, saman med sentrale medieselskap som NRK, TV 2, ITV og BT så vi er tett på bransjen. Du får treffe desse naboane i undervisningssamanheng, og du skal ha utplassering hos relevante medieselskap.

Ein ferdig utdanna bachelorstudent i film- og TV-produksjon

• kan planlegge og produsere ulike typar TV-innhald 
• kan utvikle idear, konsept og forteljingar for ulike typar TV-innhald 
• har god kunnskap om ulike tradisjonar, sjangrar og format innanfor TV

Som student i film- og TV-produksjon vil du bruke dagane dine på Media City Bergen, der det finst areal og eigne båsar til å studere. Universitetet har også mange andre lesesalar og bibliotek du kan bruke, for eksempel på SV-bygget. 

Bachelorprogrammet i film- og TV-produksjon er eit studium på fulltid. Ei typisk veke kan ha rundt 20 timar med undervisning i form av forelesingar, workshops og studentproduksjonar. Det er det praktiske arbeidet som vil ta mest tid. 

I produksjonsperiodar kan det vere intenst med arbeid, og i delar av semesteret er det krav til at du deltar på obligatorisk opplæring eller obligatoriske øvingar. I andre delar av semesteret vil du disponere tida meir fritt og sjølvstendig, og da bør du vere flink til å bruke tida til sjølvstudium, enten det er med bøker eller teknisk utstyr.

Ein bachelorgrad i film- og TV-produksjon kvalifiserer deg til arbeid innanfor film- og TV-produksjon, i yrke som TV-journalist, klippar, fotograf, lydperson eller produsent. Du vil kunne jobbe både i større organisasjonar og som sjølvstendig film- og TV-skapar. Du kan også gå inn i store multimediale mediehus som opererer på fleire plattformer. 

Samankoplinga mellom tradisjonelle og nye medium sikrar at du er vel forberedt på svært varierte yrkessituasjonar og arbeidsoppgåver innanfor alle delane av det mangslungne medie-, kunst- kommunikasjons- og informasjonsfeltet.

I primær kvote tel berre karakterpoeng og realfagspoeng/språkpoeng. Søkarar som ikkje fyller meir enn 21 år i opptaksåret og har eit førstegongsvitnemål, søker i denne kvota.

I ordinær kvote tel også forbetringar av fag, alderspoeng og tilleggspoeng. Du søker i alle kvotane du er kvalifisert for.

Du må dokumentere generell studiekompetanse utan tilleggskrav. Dette er eit krav for opptak til alle studieprogram.

For å søke dette studieprogrammet må du ha generell studiekompetanse.

Undervisningsspråk: Norsk

Bachelorprogrammet i film- og TV-produksjon er eit treårig fulltidsstudium som startar i august. 

Slik er studiet bygd opp:

1. semester

TVP100 – Introduksjon til TV-produksjon og akademisk skriving (20 studiepoeng) 

Examen philosophicum - seminarmodell eller skoleeksamen (10 studiepoeng)

2.semester

TVP102 – Det visuelle språket (30 studiepoeng) 

3.semester

TVP104 – Dokumentariske produksjonar (30 studiepoeng) 

4.semester

Frie studiepoeng eller utveksling (30 studiepoeng) 

5.semester

TVP204 – Fordjuping i fagfunksjon (30 studiepoeng) 

6.semester

TVP260 – Bachelorproduksjon (20 studiepoeng) 

TVP261 – Utplassering (10 studiepoeng)

Du kan reise på utveksling i fjerde semester.

Sjå anbefalte utvekslingsavtalar

Etter bachelorgraden kan du søke opptak til masterprogrammet i medier og kommunikasjon for seriar ved UiB. Du kan også søke på ei lang rekke internasjonale masterprogram i film/TV-produksjon.

Studieplan for Bachelorprogram i film- og TV-produksjon