Integrert masterprogram i medisinsk teknologi (sivilingeniør)

På dette studiet tileignar du deg unike ferdigheiter frå begge verder, noko som rustar deg til å forme framtidas helsevesen. 

På masterprogrammet i medisinsk teknologi spør vi:  

• Korleis stille presise diagnosar ved kjemisk analyse av kroppsvæsker?  
• Korleis utvikle legemiddel ved bruk av ny teknologi? 
• Korleis fjerne kreftsvulstar raskt og skånsamt ved hjelp av stråleterapi?  
• Korleis få best mogleg bilete for diagnostisk bruk ved hjelp av PET og MRI?  

Som ferdig utdanna kan du   

• utvikle teknologi og metodar som vert brukt i fagfeltet 
• planlegge eksperiment og gjere kvantitative berekningar og analysar av store datamengder relatert til medisinsk diagnose og behandling  
• beskrive og bruke teknologi som er viktig innan medisinsk og tilgrensande fagområde  

Studieløpet gir deg tverrfagleg kompetanse samtidig som du får moglegheit til å spesialisere deg.

Hos oss  vil du oppleve eit godt studentmiljø og få tett oppfølging.  

I løpet av ei typisk veke vil du ha 20-25 timar med forelesingar, seminar og praktiske øvingar. I tillegg gjennomfører du praksisperiode og sjølvstendig arbeid. 

Som student hos oss vil du ha det meste av undervisninga på Nygårdshøyden midt i Bergen sentrum. Du har tilgang til lesesalar, bibliotek, kollokvierom, treningssenter, kantine, kafear og studentbar på campus. På UiB finn du òg mange ulike studentorganisasjonar. Å vere med i ein studentorganisasjon er ei verdifull investering i studietida di - det gir deg mange erfaringar og venner for livet.     

Undervisninga og litteraturen er på norsk og engelsk. Du finn timeplan og litteraturliste under kvart emne (fag) i studieplanen. Undervisninga vil i hovudsak bli gjennomført i Realfagsbygget. Der finn du blant anna læringssenter, bibliotek og lesesalar.

Sivilingeniør i medisinsk teknologi ved UiB gir deg kompetanse innan fysikk, matematikk, informatikk og medisin. Dette gjer deg kvalifisert til mange stillingar innan medisinsk teknologi, for eksempel som medisinsk ingeniør, forskar, IKT-rådgjevar eller konsulent. 

Jobbmarknaden for medisinske teknologar er god, og etterspørselen etter kvalifiserte fagfolk er stor. Med denne utdanninga har du gode moglegheiter for å få jobb i både private og offentlege helseverksemder, både i Noreg og i utlandet.

I Primær kvote tel berre karakterpoeng og realfagspoeng/språkpoeng. Søkarar som ikkje fyller meir enn 21 år i opptaksåret og har eit førstegongsvitnemål, søker i denne kvota.

I ordinær kvote tel også forbetringar av fag, alderspoeng og tilleggspoeng. Du søker i alle kvotane du er kvalifisert for.

Undervisningsspråk: Norsk

Dette integrerte masterstudiet er eit studium på fulltid. 

Studiet varer i fem år, altså 10 semester. I kvart semester tar du tre emne. På dei tre første semestera har alle studentane på programmet dei same emna, og i fjerde semester kan du velje å fordjupe deg i kjemi eller fysikk. 

Det siste året av utdanninga skal du skrive masteroppgåve. Du vil få tett fagleg rettleiing, og det er gode moglegheiter for å gjennomføre masterprosjektet i samarbeid med ei bedrift. Dette er eit større sjølvstendig vitskapleg arbeid som det tar eitt år å gjennomføre. 

Slik er studiet lagt opp: 

1. semester (haust):   

Kjemi og energi (KJEM110, 10 studiepoeng) 

Grunnkurs i matematikk I (MAT111, 10 studiepoeng) 

Innføring i medisinsk teknologi (MTEK100, 10 studiepoeng) 

2. semester (vår):  

Innføring i programmering (INF100, 10 studiepoeng) 

Mekanikk 1 (PHYS111, 10 studiepoeng) 

Lineær algebra (MAT121, 10 studiepoeng) 

3. semester (haust):  

Innføring i data science (INF161, 10 studiepoeng) 

Elektromagnetisme I (PHYS112, 10 studiepoeng) 

Menneskets fysiologi (FARM280, 10 studiepoeng) 

 4. semester (vår):  

Brukarkurs i matematikk II (MAT102, 10 studiepoeng) eller Grunnkurs i matematikk II (MAT112, 10 studiepoeng) 

Praksisutplassering i Medisinsk Teknologi (MTEK200, 10 studiepoeng) eller Examen philosophicum (10 studiepoeng) 

Vel studieretning (fordjuping) 

Kjemispesialisering: Organisk kjemi (KJEM130, 10 studiepoeng) 

Fysikkspesialisering: Grunnleggande målevitskap og eksperimentalfysikk (PHYS114, 10 studiepoeng) 

 5. semester (haust):  

Planlegging av eksperiment og analyse av fleirvariable data (KJEM225, 10 studiepoeng) eller Grunnkurs i statistikk (STAT110, 10 studiepoeng) 

Praksisutplassering i Medisinsk Teknologi (MTEK200, 10 studiepoeng) eller Examen philosophicum (10 studiepoeng) 

Kjemispesialisering: Kjemisk syntese og analyse (KJEM124, 10 studiepoeng) 

Fysikkspesialisering: Moderne fysikk II (PHYS119, 10 studiepoeng) 

 6. semester (vår):  

Innovasjon ved designtenkning (INNOV201, 10 studiepoeng) 

Kjemispesialisering: Analytisk kjemi (KJEM250, 10 studiepoeng) og Radiokjemi og radioaktivitet (KJEM260, 10 studiepoeng)  

Fysikkspesialisering: Fysikk i medisinsk diagnostikk (PHYS212, 10 studiepoeng) og Strålingsfysikk (PHYS231, 10 studiepoeng) 

 7. semester (haust):  

Innføring i maskinlæring (INF264, 10 studiepoeng) 

Måleteknologi (HTEK201, 10 studiepoeng)  

Kjemispesialisering: Kvalitetssikring av kjemiske analysar (MTEK330, 10 studiepoeng) eller Vidaregåande organisk kjemi (KJEM231, 10 studiepoeng) 

Fysikkspesialisering: Medisinsk fysikk i stråleterapi (PHYS213, 10 studiepoeng) 

 8. semester (vår):  

Masteroppgåve (MTEK399) 

Valemne (20 studiepoeng) 

 9. semester (haust):  

Masteroppgåve (MTEK399) 

Kjemispesialisering: Flow kjemi og teknologi (MTEK320, 10 studiepoeng) 

Fysikkspesialisering: Laboratoriekurs i måleteknologi og instrumentering (HTEK202, 10 studiepoeng) 

10. semester (vår):  

Masteroppgåve (MTEK399) 

Du kan reise på utveksling i sjette, sjuande eller åttande semester og studere ved ei rekke utdanningsinstitusjonar som Det matematisk-naturvitskaplege fakultet har utvekslingsavtalar med.

Sjå anbefalte utvekslingsavtalar

Studiet gir eit godt fundament for vidare doktorgradsstudium i fagfeltet.

Studieplan for Integrert masterprogram i medisinsk teknologi (sivilingeniør)