Prioritering og styring i offentleg sektor

Masteremnet Prioritering og styring i offentleg sektor gir eit samfunnsøkonomisk perspektiv på korleis offentleg forvaltning kan bidra til at samfunnets ressursar blir utnytta på best mogleg måte. Emnet er ein del av fem frittståande emne i Erfaringsbasert master i offentleg forvaltning. Dette er eit nytt masterprogram som er utvikla av UiB og NHH Executive i fellesskap og som rettar seg mot erfarne medarbeidarar og leiarar i departementsfellesskapet og i departementa sine underliggjande verksemder.

Sentrale tema

Offentleg forvaltning og statseigde foretak disponerer store ressursar på vegner av det norske samfunnet. Det er difor viktig at beslutningstakarane på alle nivå har insentiv til å ta gode og effektive val i tråd med overordna mål og prioriteringar. Den første delen av emnet handlar om insentiv for offentlege beslutningstakarar og utfordringar som kan oppstå når oppgåver blir delegerte, til dømes innanfor viktige sektorar som samferdsle, utdanning, helse og energi.

Ein viktig føresetnad for effektiv ressursutnytting er gode og transparente prosessar for å ta det beste valet mellom ulike prosjekt eller løysingar. Andre del av emnet ser på korleis viktige aspekt som samfunnsøkonomisk effektivitet, berekraft og fordeling kan inngå i prosjektvurderingar i offentleg sektor. Denne delen gir djupare kunnskap i nyare forsking og teori om mellom anna nytte-kostnadsanalyse som verktøy for å ta gode beslutningar.

Offentlege verksemder opererer ofte side om side med andre statlege føretak eller private bedrifter. Eit stort og viktig spørsmål er difor korleis interaksjonen mellom offentlege og private aktørar bør styrast og regulerast. Den tredje delen av emnet belyser dette spørsmålet ved hjelp av økonomisk teori og case-studiar, og vil leggje særleg vekt på regelverk for konkurranse og anbodsprosessar.

Kandidaten skal ved avslutta emne ha oppnådd følgjande læringsutbytte:

Kunnskap

Kandidaten har kunnskap om ...

• økonomiske problemstillingar som bør vurderast og takast omsyn til i offentlege prosjekt
• insentiv for offentlege beslutningstakarar og korleis ulike omsyn kan balanserast
• korleis interaksjonen mellom offentlege og private aktørar bør styrast og regulerast

Ferdigheiter

Kandidaten kan ...

• både bidra til å utarbeide nytte-kostnadsanalysar og vurdere gjennomførte nytte-kostnadsanalysar
• drøfte styrkar og svakheiter ved ulike insentivordningar i offentleg sektor
• drøfte utforminga av anbudskonkurransar

Generell kompetanse

Kandidaten kan ...

• analysere metodiske problemstillingar knytte til prioritering og styring i offentleg sektor
• bidra med økonomisk kompetanse og samarbeide med fagfolk i ulike tverrfaglege prosjekt
• formidle analysar av økonomiske problemstillingar i offentlege prosjekt