Masteroppgåve i havbruk (sivilingeniør)

Masterstudiet/Sivilingeniørstudiet i havbruk skal gje studenten trening i eit sjølvstendig arbeid innan eit spesialisert område. Gjennom fagleg fordjuping skal studenten sin evne til kritisk og vitskapeleg tenking utviklast.

For nærare beskriving av programmet sine mål og læringsutbyte - sjå Havbruk (sivilingeniør), master, 5 år | Universitetet i Bergen (uib.no)

Programstyret på masterprogrammet og rettleiarane skal syte for at det til kvar tid finst eit tilbod av definerte oppgåver. Oppgåver som vert tilbydde skal helst vere godkjend på førehand av programstyret med tanke på utforming og omfang av oppgåva (dvs. oppgåva skal kunne gjennomførast innan normert tid). Oppgåveprosjekt kan også bli utforma i ein dialog mellom rettleiar og student og deretter godkjent av programstyret.

Studenten skal ved avslutta emne ha følgjande læringsutbyte definert i kunnskap, ferdigheiter og generell kompetanse:

Kunnskap:

Studenten skal

• opparbeide brei fagleg fordjuping innan sitt spesialiserte fagområde i biologi og få spesialisert innsikt knytt til tema i sjølve masteroppgåva

Ferdigheit:

Studenten

• meistrar å planleggje og gjennomføre sjølvstendig eksperimentelt arbeid og/eller feltarbeid under rettleiing og i tråd med gjeldande forskingsetiske normer og reglar for tryggleik i laboratoriet og i felt dersom det er nødvendig for oppgåva
• meistrar å planleggje og gjennomføre sjølvstendig analysearbeid under rettleiing og i tråd med gjeldande forskingsetiske normer og reglar
• meistrar både munnleg og skriftleg formidling av eigne og andre sine forskingsresultat
• kan vurdere eigne og andre sine forskingsresultat
• kan hente inn, analysere og nytte ny kunnskap innan sitt spesialfelt i biologi

Generell kompetanse:

Studenten

• meistrar vurdering av kjelder, kritisk vurdering av faglitteratur og kritisk vitskapeleg tenking og arbeide i tråd med vitskaplege prinsipp
• kan reflektere over sentrale etiske og vitskapelege problemstillingar i eige og andre sitt arbeid
• kan presentere, munnleg og skriftleg, forskingsresultat sett i samanhang med eksisterende kunnskap, også til ikke-spesialister