Kunst, retorikk og lærdomstradisjonar i før- og tidlegmoderne tid

Dette er eit teori-emne som skal gi ei fordjuping i kunst, retorikk og lærdomstradisjonar i før- og tidleg-moderne tid i eit historisk perspektiv. I emnet legg vi vekt på eit kulturhistorisk perspektiv på kunst (ars/tekhne), retorikk og naturhistoriske forståingar og tenkjemåtar. Sentralt står ulike historiske definisjonar og måtar å tenkje kring visuelle uttrykk, kva bilete er og gjer og kva for vitens- og kunnskapsdiskursar bilete kunne vera ein del av. Konkrete døme er henta frå antikk, mellomalder og tidleg nytid.

Tema som vert tekne opp er m.a. tilhøvet mellom historisk visuell kultur og retorisk teori, bilete og kunnskapsdanning, kunst (ars/tekhne) som kunnskap og kulturforståing. I emnet vil undervisinga vere både kronologisk og tematisk organisert. Vi vil studera dei kulturelle tradisjonane i antikken, mellomalderen og tidleg nytid og deira etterliv.

Val av tematisk tyngdepunkt kan variera frå semester til semester.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar

Studenten

*har ei fordjuping innanfor kunst, retorikk og lærdomstradisjonar i antikk, mellomalder og tidleg nytid i vid kulturhistorisk tyding.

*har solid kunnskap om forskings-tradisjonar innan tema i emnet.

*har gode føresetnadar for vidare studiar i antikk, mellomalder og tidleg nytids kunst- og kulturhistorie.

Ferdigheiter

Studenten

* kan uttrykke seg kritisk i eit fagspråk innanfor fordjupingsemnet og kan nytta eit fagspråk på relevant og dekkjande vis innanfor eldre kunsthistorie og kulturhistorie allment.

* kan nytte retorikk som analysereiskap

* kan nytte ei kritisk tilnærming til diskusjonen om det førmoderne kunst- og biletomgrepet og handsame teoretiske problem i omgangen med ulike visuelle uttrykk og deira ulike bruksområde.

Generell kompetanse

Studenten

*kan framstille sentralt fagstoff frå førmoderne kunst- og kulturhistorie skriftleg og munnleg på sjølvstendig vis.

*kan utveksle eigne faglege synspunkt og erfaringar om eldre kunst- og kulturhistorie

*ha røynsle med kritisk refleksjon og argumentasjon og sjølvstendig akademisk arbeid

*har kunnskap om kommunikasjons- og kunnskapsforståing i eit historisk perspektiv.