Observasjon, kartlegging og tiltak i barnehagen

Emne vil gje studentane ei grunnleggjande forståing for omgrep som inkludering, likeverd og tidleg innsats, og korleis desse omgrepa er sentrale i arbeidet med å utvikle eit godt omsorgs- og læringsmiljø i møte med ei mangfaldig barnegruppe i barnehagen. Studentane vil vidare få ein generell innføring i kartlegging- og tiltaksarbeid i eit individ- og systemperspektiv, medrekna korleis tiltakskjeda fungerer når ein har identifisert eit spesialpedagogisk behov. I denne samanhengen vil fokuset i særleg grad rette seg mot utvikling og vanskar innanfor område som språk, leik og sosial kompetanse, samt korleis barnehagen kan legge til rette for eit godt samarbeid med foreldre/føresette og aktuelle hjelpe- og støttetenester.

Emnet vil vidare gje studentane ei grunnleggjande forståing av omgrep slik som normalitet, avvik, normering, standardisering, validitet og reliabilitet. Dette er naudsynt for å kunne vurdere relevans og kvalitet i ulike kartleggingsmateriell/testar, og for å kunne observere, vurdere og drøfte etiske dilemma i tilknyting til bruk av slikt materiell i barnehagen.

Studentane skal gjennom deltakande observasjonspraksis få kjennskap til barnehagen som institusjon, samt korleis ein gjennom observasjon, kartlegging, vurdering og tiltak kan betre det ordinære opplegget i barnehagen samt hjelpe barn med særskilte behov.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar

Studenten...

• har kunnskap om sentrale omgrep slik som inkludering, likeverd og tidlig innsats, og korleis desse omgrepa er sentrale i arbeidet med å utvikle eit godt omsorgs- og læringsmiljø i barnehagen
• har kunnskap om omgrep slik som observasjon, kartlegging, dokumentasjon og test, samt ulike definisjonar av normalitet og avvik
• har kunnskap om sentrale omgrep innanfor testteori og som er gjeldande når ein skal vurdere kvaliteten på kartleggingsmateriell, slik som normering, standardisering, validitet og reliabilitet
• har kunnskap om språkutvikling, leik og sosial kompetanse hjå barn i barnehagealder, samt kunnskap om kva som karakteriserar utviklinga til barn som strevar på desse områda
• har kunnskap om korleis barnehagen kan etablere og utvikle eit godt samarbeid med foreldre/føresette og aktuelle hjelpe- og støttetenester

Ferdigheiter

Studenten...

• kan gjere greie for bruken av ulikt kartleggingsmateriell og prosedyrar som er gjeldande i  spesialpedagogisk praksis.
• kan gjere greie for korleis kunnskap frå observasjon og kartlegging kan nyttast for å setje i verk tiltak på individ- og systemnivå
• kan gjennomføre observasjonar av barn i naturlig samspel, der observasjonane skal vera retta mot språkferdigheiter, leik og/eller sosial kompetanse
• kan utforme intervjuguide og gjennomføre eit intervju av pedgogisk personale på praksisstaden

Generell kompetanse

Studenten...

• kan kritisk reflektere rundt bruk av kartleggingsmateriell/testar i barnehagen
• kan reflektere over etiske dilemma innanfor det spesialpedagogiske fagfeltet
• kan formidle og kommunisere spesialpedagogiske problemstillingar knytt til utøvinga av rolla som spesialpedagog på eit grunnleggjande nivå