Kurs i norsk språk og kultur for framandspråklege studentar, trinn 4

Norskkursa gir ikkje studiepoeng for søkjarar med norsk som morsmål

NOR-U4 er for viderekomne og bygger på NOR-U2/3 eller NOR-U3.

Emnet skal gjere deltakarane i stand til å bruke norsk munnleg og skriftleg med god presisjon, både reseptivt og produktivt, i allmenne og faglege samanhengar. Ein vil arbeide med autentiske tekstar med eit relativt høyt språkleg nivå, ordtilfang og idiomatiske uttrykk. Ein vil ta opp ulike tema gjennom kurset, og deltakarane vil gjennom aktiv deltaking få kunnskap om og innsikt i tema som norsk språk og litteratur og nokre aktuelle samfunnsspørsmål.

Kursa kan kombinerast på følgjande måte:

1. NOR-U1 (15 Stp) + NOR-U2 (15 Stp) + NOR-U3 (15 Stp) + NOR-U4 (10 Stp)
2. NOR-U1/2 (30 Stp) + NOR-U3 (15 Stp) + NOR-U4 (10 Stp)
3. NOR-U1 (15 Stp) + NOR-U2/3 (30 Stp) + NOR-U4 (10 Stp)

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar

• Studentane skal beherske komplekse strukturar i norsk og ha eit ordforråd som gjer ein i stand til å forstå autentiske tekstar om allmenne og faglege problemstillingar på norsk. I tillegg må dei kunne oppdatere seg innan eige fagfelt og om allmenne emne.

Ferdigheiter

• Studentane skal kunne forstå og snakke flytande om autentiske tekstar om allmenne og faglege problemstillingar på norsk.
• Dei skal også kunne forstå meir akademiske innlegg/foredrag om faglege og allmenne emne på norsk og vere i stand til å problematisere slike.
• Dei skal utan særlege vanskar forstå norske akademiske tekstar frå ulike fagfelt.
• Dei skal kunne uttrykke seg skriftleg og munnleg på norsk med variert språk, idiomatikk og komplekse strukturar.

Generell kompetanse

• Studentane skal ha gode nok språkferdigheiter til å både kunne formidle og oppdatere kunnskapane sine innan sitt eige fagområde og innan allmenne emne på både skriftleg og munnleg norsk.