Digitalisering av kulturarven: Teoretisk innføring og praktisk utprøving

Mål:

Målet for emnet er å gje studenten praktiske dugleikar som er etterspurde i museum og arkiv.

Digitalisering spelar i dag ei viktig rolle i både arkiv- og museumssektor. Det gjer kjeldemateriale og gjenstandssamlingar lettare tilgjengeleg for publikum, samstundes som dei digitale kopiane kan fungere som sikringskopiar. Dette opnar for nye moglegheiter for formidling og forsking. Emnet tar for seg nokre av dei grunnleggande digitale ferdigheitene ein vil ha bruk for i forvaltningsarbeid i arkiv, museum og kulturminnevern.

Emnet gjev ei innføring i den grunnleggande tenkinga bak digitalisering, som betydninga av metadata, standardar og system for digitalisering. Det gjev også ei historisk innføring i katalogiseringsprinsipp og overgangen til digitale system for historiske samlingar og arkiv. Samstundes vil emnet gje ei innføring i problemstillingar knytt til registreringsarbeid, transkribering og maskinlesing av digitalt materiale. Gjennom undervising og praksisseminar får studenten opplæring i digitaliseringsprosessar.

Studenten skal ved avslutta emne ha følgjande læringsutbytte definert i kunnskap, ferdigheiter og generell kompetanse:

Kunnskap

Studenten

• har grunnleggande innsikt i og forståing av den digitale infrastrukturen innan forvaltningsarbeidet i museum, arkiv og andre samlingar.

• har konkrete kunnskapar om standardar og bruk av metadata i digitaliseringsarbeid

• har ei grunnleggande innsikt i den historiske utviklinga av digitaliseringsarbeid

• har ei grunnleggande innsikt i ulike teoretiske grunnlag for registrerings- og katalogiseringspraksisar

• har konkrete kunnskapar om dei ulike stega i digitaliseringsprosessar innan samlingsforvaltning

Ferdigheiter

Studenten

• har kjennskap til og praktisk erfaring med ulike forvaltningsverktøy og standardar som vert nytta i digitaliseringsarbeid.

• har praktisk erfaring med digitaliseringsarbeid innan arkiv, museum eller kulturminnevern.

Generell kompetanse

Studenten

• har ei forståing av grunnleggande omgrep og standardar for digitalisering av historisk materiale

• kan reflektere over moglegheiter og utfordringar ved digitalisering av kulturarv