Dei paleobotaniske samlingane

Dei paleobotaniske samlingane inneheld meir enn 60 000 pollen- og 25 000 makrofossil/trekolprøvar. Til forsking på tidlegare vegetasjon og miljø analyserast pollen, sporar, algar og andre mikroorganismar, og makrofossilar som frø og frukter. Pollenanalyse er den viktigaste metoden vi har for å rekonstruere vegetasjonshistoria, medan makrofossil- og trekolanalyse nyttast til å tolke tidlegare lokal vegetasjon og menneskeleg aktivitet.

I samband med arkeologiske frigjevingsundersøkingar knytt til utbyggingssaker samlast det inn eit uerstatteleg kjeldemateriale for framtidig forsking. Difor er det høgt fokus på strategisk innsamling for å studere vegetasjon og miljø tilknytt menneskeleg aktivitet. Resultata frå paleobotaniske undersøkingar presenterast i rapportar, artiklar, opne dagar på Universitetsmuseet eller føredrag.

Paleobotanisk forsking har lange tradisjonar ved UiB. Paleobotanikk, osteologi og geologi dannar den tverrfaglege forskargruppa FLOM. Laboratoriefasilitetane er samlokalisert med Institutt for biovitenskap (palaeoecology@uib).