Organisasjonsteori

GOV320 Organisasjonsteori skal gi eit grundig fundament for å analysere og forstå funksjonane og beslutningsprosessane i offentlege, frivillige og private organisasjonar. Hovudtemaet i emnet er samspelet og samhandlinga mellom organisasjonar og omgjevnadene deira: Korleis og når tilpassar organisasjonar seg til eksisterande omgjevnader og endringar i desse? Korleis og når påverkar organisasjonar omgjevnadene sine? Kva faktorar fører til at slike inter- og intraorganisatoriske aktivitetar finn stad (eller ikkje)?

Emnet skal gi grunnleggande kunnskap om teoretiske og empiriske spørsmål innan klassisk og moderne organisasjons- og institusjonsteori. Det skal òg gi eit godt grunnlag for å forstå korleis teoriane kan nyttast i studiar av politikk og forvaltning. Kurset dekkjer klassiske tekstar innan organisasjonsteori og analysar av den nyaste forskingslitteraturen.

I emnet blir det kombinert førelesingar, praktiske øvingar og døme frå forsking og praksis. Det blir lagt stor vekt på å førebu studentane på å bruke ulike teoritradisjonar sjølvstendig i empirisk analyse, og med det leggje grunnlaget for arbeidet med masteroppgåva.

Ein kandidat som har fullført dette emnet skal ha følgjande læringsutbytte, definert i kunnskap, ferdigheiter og generell kompetanse:

Kunnskap

Studenten:

• Har god oversikt over, og kan gi ei systematisk framstilling av, både klassisk og nyare organisasjons- og institusjonsteori
• Har solid kunnskap om, og forståing for, korleis organisasjonar og omgjevnadene deira påverkar kvarandre
• Har solid kunnskap om korleis ulike teoriar innan organisasjons- og institusjonsforsking kan bidra til å forstå korleis offentlege, frivillige og private organisasjonar tek avgjerder
• Har solid kunnskap om relevante faglege perspektiv og korleis ein kan knyte dei til ulike organisasjonar si handtering av samfunnsutfordringar

Ferdigheiter

Studenten:

• Kan forklare relevansen av organisasjons- og institusjonsteori innan offentleg forvaltning og politikk
• Kan bruke kunnskapen til å analysere aktuelle forskingsbidrag og politiske spørsmål med utgangspunkt i særtrekka ved forskingsfeltet
• Kan vurdere relevansen av faglege perspektiv frå organisasjons- og institusjonsteori og bruke desse i eiga forsking
• Kan utvikle og presentere kritisk analyse av relevant litteratur, forstå samanhengen mellom teori og empiri, og bruke denne kunnskapen i praksis

Generell kompetanse

Studenten:

• Kan forklare betydninga av ulike faglege perspektiv for personar som ikkje har inngåande kjennskap til faget
• Kan bruke tileigna kunnskap i grundige og konstruktive tilbakemeldingar på skriftlege og munnlege presentasjonar
• Kan bidra til kritisk tenking og problemløysing innan ulike samfunnsområde generelt, og innan forvaltning og politikk spesielt
• Kan arbeide sjølvstendig og vise god skriftleg og munnleg framstillingsevne
• Kan gjennomføre sjølvstendige forskings- og utgreiingsarbeid