Praktisk forskningsetikk

Målet med emnet er å gi stipendiatar nødvendig kompetanse i å handtere og vurdere forskingsetiske utfordringar som følger med forskingsprosjekt i humaniora generelt og eige doktorgradsprosjekt spesielt.

Emnet gir ei innføring i relevant lovverk og forskingsetiske retningslinjer i Noreg, som til dømes forskingsetikklova, EU si personvernforordning og NESH sine forskingsetiske retningslinjer. Med utgangspunkt i ph.d.-kandidatane sine forskingsprosjekt, vert det diskutert moglege etiske utfordringar som kan oppstå i forskingsprosessen, spesifikke problemstillingar og retningslinjer (til dømes forsking på menneskelege leivningar, forsking på etniske minoritetar eller internettforsking) samt utfordringar som oppstår ved forsking i andre land med varierande normer og lovverk.

Emnet gir også ei innføring i korleis ein samlar inn, lagrar og handterer forskingsmateriale på ein forsvarleg måte og i tråd med personvernforordninga. I tillegg vert det diskutert forskingsetiske aspekt ved akademisk skriving og publisering, til dømes bruk av KI-verktøy, plagiat og medforfattarskap. Vidare står diskusjonar om forskaren sitt ansvar og si rolle (og sikkerheit) i møte med informantar og menneskelege uttrykksformer, i fortid og notid, sentralt. Det vert lagt særleg vekt på forskingsarbeidet sin sosiale, kulturelle og religiøse kontekst, samt dei forskingsetiske utfordringane dette medfører. Tema som er særleg relevante for historisk, arkeologisk, kultur- og religionsvitskapeleg forsking, slik som kulturminnekriminalitet, uklar proveniens og mogleg utilsikta politisk bruk av forskinga, vert drøfta.

Doktorgradsstipendiaten skal ved avslutta emne ha følgande læringsutbytte definert i kunnskap, ferdigheiter og generell kompetanse:

Kunnskap

Stipendiaten

• har kjennskap til relevant lovverk og gjeldande forskingsetiske retningslinjer i Noreg (forskingsetikklova, EU si personvernforordning, NESH sine forskingsetiske retningslinjer) og evt. andre land der stipendiaten sitt forskingsarbeid skjer
• har kjennskap til forskingsetiske rammeverk som er spesifikke for forsking i arkeologi, historie, kultur- og religionsvitskap (til dømes forsking på menneskelege leivningar, forsking på etniske minoritetar eller internettforsking)
• har kjennskap til prosedyrane for å melde inn forskingsprosjekt som behandlar personopplysningar og relevante organ for dette (Rette, Sikt)
• har innsikt i fagdiskurs og pågåande debattar om forskingsetikk i eige fag og humaniora og samfunnsvitskap generelt

Ferdigheiter

Stipendiaten

• kan identifisere, reflektere over og handtere forskingsetiske problemstillingar i eige og andre sitt forskingsarbeid
• kan fortolke forskingsetiske retningslinjer, samt handtere spenningar mellom ulike retningslinjer og forskingspraktiske omsyn
• kan samle inn, lagre, behandle og formidle datamaterialet sitt (til dømes arkivkjelder, tekstar, artefakt, etnografiske data) på ein ansvarleg og trygg måte og i tråd med lovverk og forskingsetiske retningslinjer
• kan reflektere kritisk over eiga forskarrolle i møte med forskingsfelt og empiri og handtere moglege konfliktar som oppstår i forskingsprosessen
• kan identifisere og handtere etiske problemstillingar i akademisk skriving og publisering

Generell kompetanse

Stipendiaten

• har utvikla evna til forskingsetisk refleksjon og kan handtere forskingsetiske problemstillingar i praksis, noko som forbereder stipendiaten til ein vidare forskarkarriere eller forskingsadministrativt arbeid
• kan nytte kunnskapar om og ferdigheiter i forskingsetikk til å diskutere forskingsetiske problemstillingar i eige og andre sitt fag, samt gi grunnleggande rettleiing om forskingsetikk til studentar
• kan delta aktivt i debattar om forskingsetikk i forskarsamfunnet