Biologi som endrar verda
Lågaregradsemne
- Studiepoeng
- 10
- Undervisningssemester Vår
- Emnekode
- BIOVIT100
- Undervisningsspråk
- Norsk
- Ressursar
- Timeplan
Emnebeskrivelse
Mål og innhold
Korleis har biologisk kunnskap bidrege til å løyse nokre av dei største utfordringane menneskesamfunnet har stått overfor? I dette emnet vil studentane utforske korleis biologiske observasjonar, teoriar og metodar har blitt utvikla til konkrete løysingar innan til dømes helse, matproduksjon, naturforvaltning og miljø.
Gjennom historiske og moderne case skal studentane analysere korleis biologar har identifisert problem, utvikla ny kunnskap og omsett denne kunnskapen til praktiske tiltak. Døme på tema er utviklinga av vaksinar, antibiotika og handteringa av antibiotikaresistens, den grøne revolusjonen, pasteurisering, biologisk skadedyrkontroll, bevaringsbiologi og restaurering av natur, samt bioremediering av forureina miljø.
Emnet legg vekt på samanhengen mellom biologisk forsking, samfunnsutfordringar og berekraftige løysingar. Studentane vil arbeide med problemstillingar der biologisk kunnskap spelar ei sentral rolle i å møte både historiske og framtidige utfordringar.
Læringsutbytte
Kunnskap
Studenten
- har kunnskap om sentrale eksempel på korleis biologisk forsking har bidrege til å løyse samfunnsutfordringar
- kjenner til biologiske mekanismar og prinsipp innan mikrobiologi, immunologi, genetikk, økologi, evolusjon og plantebiologi som ligg til grunn for utvalde løysingar
- forstår samspelet mellom biologisk grunnforsking, innovasjon og samfunnsutvikling
- kjenner til moglegheiter, avgrensingar og utilsikta konsekvensar av biologiske løysingar
Ferdigheiter
Studenten
- kan analysere eit samfunnsproblem og identifisere relevante biologiske problemstillingar
- kan vurdere korleis biologisk kunnskap blir utvikla, testa og omsett til praktiske løysingar
- kan bruke biologiske case til å diskutere aktuelle samfunnsutfordringar
- kan finne, tolke og formidle vitskapleg informasjon frå ulike kjelder
Generell kompetanse
Studenten
- kan reflektere over biologien si rolle i samfunnet
- kan diskutere biologiske løysingar i eit berekrafts- og samfunnsperspektiv
- kan kommunisere biologiske problemstillingar til både fagfellar og eit breiare publikum
- kan arbeide sjølvstendig og i gruppe med problemløysing basert på biologisk kunnskap