Planrett

Målet med kurset er å gi studentane kunnskap om dei viktigaste rettsreglane om forvaltning av areal og ressursar, og dermed setje studentane i stand til å nytte rettslege prinsipp og lover som gjeld areal og miljøspørsmål. Den sentrale lova i dette kurset er plan- og bygningslova, men studentane skal også ha kunnskapar om samspelet mellom plan- og bygningslova og forvaltningslova, og kunnskap om sentrale arealspørsmål i m.a. naturmangfoldlov, kulturminnelov, ureningslov, hamnelov og akvakturlov.

Plan- og bygningslova er den sektorovergripande lova for all arealforvaltning. I dette faget ser vi nærare på innhaldet i ein kommuneplan, reguleringsplan, føresegner og einskildvedtak. Sentrale tema er vidare reglar om arealforvaltning i strandsona, dispensasjon og ulovleg bygging. Det blir også gjort greie for reglane om utbyggingsavtalar, innløysing og ekspropriasjon. Eit tema som blir teke opp er òg i kor stor grad kommunen har kompetanse, og eventuelt plikt, til å gjere vurderingar av privatrettslege tilhøve ved arealplanlegging. Tema i denne samanhengen er m.a. tilhøvet mellom offentleg arealplanlegging, deling og avtalebaserte eigedomsgrenser og arealplanlegging og negative servituttar.

Etter å ha gjennomført kurset skal studenten ha grunnleggjande forståing av planprosessar og verknaden av arealplanlegging, og samspelet mellom dei offentlege lovene og samspelet mellom offentleg rett og privat rett i høve til forvaltning av areal. Studentane skal vere i stand til å løyse problemstillingar i tilknyting til:

• plan- og bygningslova sin systematikk
• reglar om tilhøvet mellom kommunal og statleg styring i plansaker, under dette reglar om innsigelse
• reglane om sakshandsaming ved planvedtak og konsekvensutgreiing
• dei rettslege styringsverkemiddla kommune- og reguleringsplan, og særleg om kva som kan inngå i rettsleg bindande føresegner til dei ulike plantypane
• reglar om høve til rettsleg overprøving av arealplanar og vedtak
• tilhøvet mellom forvaltningslov og plan- og bygningslov, og plan- og bygningslov og andre sektorlover
• reglar om søknadsplikt for tiltak
• regelen om byggjeforbodet i 100-metersbeltet og rekkjevidda av heimel til å gi dispensasjon
• reglar om utbyggingsavtalar
• reglar om innløysing og ekspropriasjon

- reglane om kommunen sin kompetanse og plikt til å ta omsyn til private rettar ved arealplanlegging og einskildvedtak