Innføring i pedagogikk for lektorstudentar

Emnet har som overordna mål å gje ei innføring i pedagogikk for lektorstudentar.

For det fyrste vil emnet gje studentane fagleg forståing for forventingar til kunnig og ansvarleg utøving av lærarrolla og lærargjerninga, med særskild vekt på lovverk og tydinga av relasjonskompetanse, klasseleiing og etikk. I tillegg vil studentane få kunnskap om pedagogiske grunnomgrep og -spørsmål, som danning og tilhøvet mellom tvang og fridom, som bidreg til å gje retning til praksis i skulen.

For det andre vil studentane verte introduserte for grunnleggjande allmenndidaktiske perspektiv og forskingsbaserte strategiar til bruk i planlegging og gjennomføring av undervisning.

For det tredje vil emnet gje studentane kunnskap om ungdom si oppleving av elevrolla og skulen og om føremål og funksjonar til skulen som institusjon.

Gjennom deltaking i emnet vil studentane starte arbeidet med å danne eigen profesjonell identitet og øve opp mellommenneskelege dygder som omsorg og respekt.

Emnet inneheld også 10 dagar med praksis, åtte av dei i skulen og to til for- og etterarbeid på campus. Undervisninga i emnet vil gjennomgåande støtte studentane i å reflektere over praksiserfaringar og -observasjonar i ljos av pedagogisk teori.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar:

Studenten

• kjenner til sentrale tema og grunnleggjande omgrep i pedagogikkfaget
• Har kunnskap om relevant lovverk og sentrale styringsdokument for læraryrket
• har fagleg forståing for tydinga relasjonskompetanse og klasseleiing har i kunnig utøving av lærarrolla og lærargjerninga
• har innsikt i kva som kjenneteiknar pedagogiske relasjonar og kva for etisk ansvar dette inneber for læraren
• har brei kunnskap om allmenndidaktiske perspektiv og forskingsbaserte strategiar knytte til planlegging og gjennomføring av undervisning
• har kunnskap om korleis unge kan oppleve elevrolla og skulen
• har kjennskap til skulen sine støttefunksjonar og samarbeid med andre instansar i møte med særskilde behov hos barn og unge
• har grunnleggjande kunnskap om føremål og funksjonar til skulen som institusjon

Kunnskapar knytte direkte til praksis:

• har kunnskap om korleis lærarar i praksis legg til rette for undervisningsaktivitetar gjennom klasseleiing og relasjonskompetanse

Ferdigheiter:

Studenten

• kan drøfte sentrale tema og grunnleggjande omgrep i pedagogikkfaget
• kan reflektere over lærarrolla på bakgrunn av praksis, faglitteratur og styringsdokument
• kan syne dømmekraft knytt til etiske utfordringar og dilemma i møte med elevar
• kan syne forståing for mangfald og ulike behov hjå elevar

Ferdigheiter knytte direkte til praksis:

• kan gjere bruk av grunnleggjande klasseleiingsferdigheiter
• kan planleggje, grunngje og gjennomføre korte undervisningsaktivitetar
• kan reflektere over samspelet mellom elevar i og utanfor klasserommet
• kan bruke observasjon som metode for å få innsikt i livet i skulen og identifisere pedagogikkfaglege problemstillingar

Generell kompetanse:

Studenten

• kan syne relasjonskompetanse og mellommenneskelege dygder
• forstår korleis unge kan oppleve det å vere elev i dagens skule
• kan reflektere over samanhengen mellom klasseleiing, gode relasjonar og kva læringsutbyte elevar får gjennom undervisning
• kan orientere seg i, analysere og stille seg kritisk til ulike informasjonskjelder og teoriar som er relevante for pedagogisk verksemd
• kan sjølvstendig gjere greie for sentrale problemstillingar, kunnskapar og metodar innan pedagogikkfaget

Generell kompetanse direkte knytt til praksis:

• kan syne relasjonskompetanse og mellommenneskelege dygder
• kan reflektere over samanhengen mellom klasseleiing, gode relasjonar og kva læringsutbyte elevar får gjennom undervisning