Masteroppgåve i kommunal leiing

Masteroppgåve i kommunal leiing representerer eit sjølvstendig arbeid der studenten skal bruke kunnskap og ferdigheitar til å analysere og reflektere over ei avgrensa problemstilling innan kommunal leiing, gjerne relevant for eiga jobbrolle eller verksemd. Føremålet med masteroppgåva er å fordjupe seg i eit tema og utføre eit sjølvstendig forskingsarbeid. Oppgåva skal gje trening i å formulere ei problemstilling, gjennomføre datainnsamling og/eller diskusjon av forskingslitteratur og teori, og dessutan analyse og tolking av eigne data. Gjennom oppgåva skal studenten vise god forståing for forskingsdesign og val av metode.

Temaet og problemstillinga skal vere relevant i tilhøve til studieprogrammet si målsetning og innhald. Tema vil normalt liggje innan felta 1) rettsleg, politisk og økonomisk handlingsrom for kommunale leiarar, 2) rolleforståing for kommunale leiarar, eller 3) operativ teamleiing i kriser. Oppgåva kan vere enten empirisk eller teoretisk orientert. Empirisk orienterte oppgåver kan nytte enten kvalitative eller kvantitative metodar.

Oppgåva kan skrivast individuelt eller i grupper på to personar. Arbeidsmengde og omfang skal stå i høve til kor mange personar som er involverte.

Studenten skal ved avslutta emne ha følgjande læringsutbyte:

Kunnskapar

Kandidaten kan

• analysere avanserte problemstillingar innan ein avgrensa del av det faglege innhaldet i dei andre emna som inngår i studieprogrammet
• gjere greie for litteratur, omgrep og teori som er relevante for tematikken til oppgåva, og vurdere relevansen av metode for datainnsamling
• diskutere spørsmål innan temaet for masteroppgåva på ein vitskapleg måte

Ferdigheiter

Kandidaten kan

• formulere ein presis og forskbar problemstilling
• utarbeide eigne planar for forsking på eit vitskapleg nivå
• gjennomføre eit sjølvstendig forskingsprosjekt under rettleiing og i tråd med gjeldande forskingsetiske normer
• bruke relevante metodar på en sjølvstendig måte
• samle, systematisere, analysere, tolke og presentere kunnskap på ein nøyaktig og oversiktleg måte

Generell kompetanse

Kandidaten kan

• reflektere over styrkar og veikskapar knytte til datainnsamling og forskingsmetodar
• reflektere over forskingsetiske spørsmål
• reflektere over vitskapelegheit i tilhøve til kommunal leiing og eigne røynsler