Butterfly-prosjektet

Prosjektet Butterfly har den fulle tittelen "Mainstreaming pollinator stewardship in view of cascading ecological, societal and economic impacts of pollinator decline" og er eit breitt internasjonalt og tverrfagleg samarbeid for forvalting av pollinerande artar i alle sektorar av økonomien.

Konsortiet består av 24 partnarar (ekstern lenke) og blir koordinert av Senter for vitskapsteori ved Universitetet i Bergen. Det skal også fokusere på dei menneskelege dimensjonane av pollinatornedgangen og jobbe med å auke engasjementet i samfunnsvitskapane og humaniora for forsking retta mot politikkutvikling.

Meir utfyllande informasjon og løpande oppdateringar finn du på prosjektet si offisielle nettside (ekstern lenke).

Sommarfugleffekten

Dei stadig aukande og potensielt øydeleggjande konsekvensane av nedgangen i pollinatorar, eller sommarfugleffekten, har gitt namn til prosjektet: Ideen om at små endringar på eitt tidspunkt kan forplante seg og føre til store konsekvensar seinare. Men sommarfuglen er berre ein av mange pollinerande artar som er livsviktige for samfunnet vårt. 

Det er store hol i kunnskapen vår om dyr som pollinerer ville og dyrka plantar i Europa utover dei mest kjende insekta som bier, sommarfuglar og møll, og Butterfly har som mål å fylle desse hola ved å auke kunnskapen vår om pollinerande artar, samt skape offentleg merksemd om og verdsetjing av dei komplekse økologiske, økonomiske og samfunnsmessige goda vi får frå pollinatorar. Prosjektet skal i tillegg bidra til å avdekke og endre lite berekraftige praksisar innan landbruk, industri og samfunn.

Verktøy for restaurering av pollinatorar

Prosjektet skal også utvikle konkrete verktøy til hjelp i innsatsen for å restaurere pollinatorane og leveområda deira: Nye modellar og datasett for å vurdere og føreseie verdien av pollinerande artar (økonomiske og andre verdiar) og verktøy for å integrere vern av pollinatorar på tvers av sektorar som mat, helse, energi, materialar og naturbruk.

Butterfly skal også etablere nettverk av interessentar frå grasrot- til EU-nivå som saman skal bidra til pollinatorforvalting» («pollinator stewardship»).

«Pollinatorforvalting» inneber at vi i alle aktivitetane våre forpliktar oss til å gjere det vi kan, på ein ansvarleg og proaktiv måte, for å auke dei positive og redusere dei negative påverknadane på pollinerande artar, og på biomangfald som er avhengig av pollinatorar. 

Levande laboratorium

Mykje av arbeidet med pollinatorforvalting skal gjerast i Butterfly sitt nettverk av levande laboratorium («Living Labs»), som vil fungere som yngleplassar for samarbeid om kunnskap og berekraftige løysingar, og bane vegen for pollinatorforvalting i alle sektorar.

Ein definisjon av eit levande laboratorium er "eit ope innovasjonsøkosystem i eksisterande miljø som bruker interaktive tilbakemeldingsprosessar gjennom heile livssyklusen til ein innovasjon, for slik å skape berekraftig påverknad.

Butterfly sine levande laboratorium skal vurdere i kva grad fem viktige forsyningskjeder avheng av pollinering: Mat/mikroernæringsstoff, legemiddel, kosmetikk, biomateriale og bioenergi. Saman med alle dei involverte i kvar forsyningsskjede skal dei levande laboratoria samskape og teste alternativ for restaurering av pollinatorar som aukar motstandskrafta i desse forsyningskjedene.

Fakta om Butterfly

• Prosjektet er finansiert under utlysinga HORIZON-CL6-2024-BIODIV-01-3: Dependence of society and the economy on pollinators (ekstern lenke)
• Budsjettet er på 7 millionar euro, der 904 000 euro går til UiB
• BUTTERFLY blir koordinert av Universitetet i Bergen og har 24 partnarar frå 13 europeiske land og tre oversjøiske territorium utanfor Europa: Noreg, Tyskland, Frankrike, Hellas, Danmark, Irland, Finland, Nederland, Polen, Italia, Spania, Belgia, Storbritannia, Grønland, Curaçao og Martinique
• Prosjektet skal opprette seks levande laboratorium ("Living Labs") i Spania, Nederland, Danmark, Frankrike, Noreg og Italia.