Ta kontakt med verten din først
Som gjesteforskar har du fullført ein mastergrad og er invitert til UiB for eit mellombels forskingsopphald. Det første du bør gjere, er å ta kontakt med verten eller rettleiaren din ved UiB. Avklar opphaldet med dei før du startar med dei formelle stega knytte til innreise.
Innreise og opphaldsløyve
Nordiske borgarar
Du har ingen krav knytte til opphald under seks månader. Ved lengre opphald må du registrere deg hos Skatteetaten.
EU/EØS-borgarar
Ved opphald under 90 dagar treng du ikkje registrere deg hos politiet. Skal du vere her lenger, registrerer du deg på nett hos UDI og møter deretter personleg ved Servicesenter for utanlandske arbeidstakarar (SUA) i Bergen for å få registreringsbevis og skattekort. Ta med pass eller nasjonalt ID-kort, invitasjonsbrev og dokumentasjon på at du kan forsørgje deg sjølv.
Borgarar utanfor EU/EØS
Du treng eit offisielt invitasjonsbrev frå instituttet ved UiB. Ved opphald over 90 dagar må du søkje om opphaldsløyve hos UDI, og søknaden må startast frå heimlandet. Organisasjonsnummeret til UiB er 874 789 542.
Skatt, trygd og helse
Skatt og ID
Dersom du får løn frå UiB, må du søkje om skattekort. Opphald på meir enn 14 dagar i løpet av året krev ID-kontroll hos Skatteetaten.
Trygd
Dersom du får løn, må du leggje fram dokumentasjon på trygdetilknyting frå heimlandet.
Helse og tuberkulosekontroll
EU/EØS-borgarar kan nytte europeisk helsetrygdkort. Skal du opphalde deg i Noreg i meir enn tre månader, treng du eit S1-skjema. Borgarar utanfor EU/EØS må ha eiga forsikring.
Kjem du frå eit land med høg førekomst av tuberkulose og skal opphalde deg i Noreg i 90 dagar eller meir, må du gjennomføre ein gratis tuberkulosekontroll.
Bolig
Du må ordne bustad sjølv. UiB har eit avgrensa tal gjestebustader som instituttet ditt kan bestille for deg.
Offisielle nettstader
Det formelle rundt opphald og skatt ordner du hos norske myndigheiter.