Klima- og naturforteljingar

Klimaendringane og tap av naturmangfald er nokre av dei største samfunnsutfordringane i vår tid. Desse komplekse problema har både sosiale, politiske, etiske og kulturelle årsaker og konsekvensar. Difor er det viktig å belyse klima- og miljøutfordringane frå mange ulike disiplinar og perspektiv, inkludert humanistiske. Emnet KLIMA200 har som mål å gje innsikt i humanistiske og tverrfaglege tilnærmingar til klima- og naturspørsmåla, med utgangspunkt i at dei ofte tek form av forteljingar, eller narrativ.

Formålet med emnet er å reflektere rundt formidling av klima- og naturspørsmål gjennom ulike diskursar og korleis ein kan tolke desse forteljingane. Studentane vil studere teksteksempel frå til dømes naturvitskap, skjønnlitteratur, media og politikk. Sentrale spørsmål vil vere språket si rolle i klima- og miljødiskursen og korleis forteljingar kan auke forståinga vår av desse utfordringane. Emnet vil i tillegg gje ei innføring i sentrale omgrep som diskurs og forteljing, og gje innblikk i nokre utvalde tekstar knytte til dømes til humanistisk miljøforsking og økokritikk.

Studenten skal ved avslutta emne ha følgjande læringsutbytte definert i kunnskap, ferdigheiter og generell kompetanse:

Kunnskap

Studenten

• skal kjenne til ulike forteljingar om klima og natur frå ulike felt
• skal kunne gjere greie for nokre sentrale problemstillingar og tilnærmingar i den humanistiske klima- og naturforskinga

Ferdigheiter

Studenten

• kan presentere, drøfte og analysere ulike forteljingar om klima og natur i lys av teori og relevante metodiske tilnærmingar

• kan bruke kunnskapen frå emnet til å utvikle fagleg funderte problemstillingar knytte til klima- og naturforteljingar

Generell kompetanse

Studenten

• kan forstå korleis klima- og miljøspørsmål blir formidla gjennom forteljingar
• er i stand til å identifisere klima- og naturforteljingar og vurdere deira oppbygging og hensikt i ulike samanhengar

Haust

Emnet vert tilbydd om ressurssituasjonen tillèt det.