Likestilling og mangfald med arbeidslivspraksis

OBS. Påmeldingsfrist haust 2025 - søndag 24. august 2025.

Her finner du mer informasjon, blant annet om de ulike bedriftene og organisasjonene hvor du kan ha praksis: https://www.uib.no/skok/178536/likestilling-og-mangfald-med-arbeidslivspraksis-kvik112

Emnet gir ei grunnleggande innføring i sentrale omgrep og debattar innan likestillingsfeltet, med vekt på forholdet mellom likestilling og mangfald, samt ei brei innføring i likestillingas historie. Dagens likestillingsdebatt- og lovgjeving opererer med ei rekkje ulike diskrimineringsgrunnlag, så som kjønn, etnisk bakgrunn, klasse, rase, språk, religion, seksuell orientering, funksjonsevne og alder.

Emnet tar sikte på å lære studentane å analysere forholdet mellom desse kategoriane ut frå ulike teoretiske perspektiv, samt å øve dei i å identifisere praktiske og teoretiske utfordringar som følger av samspel mellom ulike diskrimineringsgrunnlag. I undervisinga legg ein vekt på historiske, strukturelle og ideologiske føresetnader for endringar i høve til korleis likestilling blir forstått og handsama i praksis. Omgrepet likestilling blir og drøfta i forhold til andre verdilada omgrep som menneskerettar, demokrati, fridom og forskjell.

Undervisinga tek utgangspunkt i norske lovverk og praktiske døme, som blir undersøkt kritisk i eit historisk og globalt perspektiv.

Både seminarundervising og arbeidslivspraksis har som mål å auke studentane sitt medvit om eigen kompetanse, og om forholdet mellom den akademiske verksemda ved emnet på den eine sida og behov i arbeids- og organisasjonslivet på den andre sida. Studentane skal utvikle kjennskap til relevante arbeidsplassar, og øve på å aktivere denne kjennskapen i arbeidet med pensum. Samstundes skal studentane kunne bruke si faglege forståing til å løyse praktiske oppgåver på arbeidsplassen, og til å reflektere over vilkår som gjeld der. Studentane får høve til å ta initiativ og gi innspel i arbeidspraksis så vel som på seminar, og til å analysere dei erfaringane dei gjer seg i samråd med rettleiar.

Den einskilde student sine oppgåver i praksisperioden blir konkretiserte i ein kontrakt mellom studenten og den aktuelle arbeidsplassen. Oppgåvene skal ha relevans for den faglege kompetansen emnet gir, og studenten skal få høve til å bidra sjølvstendig og kreativt.

Emnet omfattar eit førebuande seminar i forkant av arbeidspraksis, der samarbeidspartnarar og praktiske omstende vert introdusert. Praksis er óg tema for to oppfølgingsseminar.

Kandidaten:

Kunnskap

• Har kunnskap om sentrale omgrep og debattar innan likestillingsfeltet.
• Har kunnskap om tilhøvet mellom likestilling og mangfaldsproblematikk.
• Har kunnskap om likestilling og mangfald i eit historisk og globalt perspektiv.
• Har kunnskap om og erfaring med arbeid med likestilling og mangfald på aktuelle arbeidsplassar.
• Har kunnskap om korleis faglege spørsmål står i forhold til praktisk arbeid.

Ferdigheiter

• Kan reflektere sjølvstendig og kritisk over sentrale problem på likestillings- og mangfaldsfeltet.
• Kan diskutere norsk likestillingsdebatt i eit historisk og komparativt perspektiv.
• Kan analysere tilhøvet mellom ulike diskrimineringsgrunnlag ved hjelp av teoretiske omgrep.
• Kan nytte fagleg kunnskap i praktisk arbeid.
• Kan vege ulike faglege omsyn opp mot kvarandre i høve til konkrete arbeidsoppgåver.
• Kan ta ei aktiv og kreativ rolle på arbeidsplassen.

Generell kompetanse

• Kan orientere seg i faglitteratur og offentlege dokument.
• Kan formidle kunnskap frå faglege kjelder.
• Kan bruke faglege perspektiv til å tenke kritisk og analytisk om samfunnsaktuelle tema.
• Kan utveksle erfaring og synspunkt på fagleg verksemd.
• Kan reflektere over eiga rolle i arbeidssituasjonar.
• Kan identifisere behov i arbeidssituasjonar.