Film, TV og visuell kultur: Historie og teori

Målet med dette emnet er å styrkje studentane si kunnskap om visuelle tekstar sin form og innhald, og å utvikle evna til å bruke sentrale teoriar og analytiske perspektiv på utvalde medietekstar. Det blir lagt vekt på å knyte uttrykksmessige og innhaldsmessige aspekt ved medietekstane til relevante kontekstuelle faktorar. Desse kan variere frå semester til semester, til dømes i form av institusjonelle, teknologiske og/eller produksjonsmessige rammevilkår. Emnet tek også sikte på å setje tekstane inn i ein breiare kulturhistorisk kontekst. Det kan òg ha fokus på bestemte uttrykk, sjangrar, praksisar eller tema som kjenneteiknar den visuelle mediekulturen.

Dette semesteret er målet med emnet å gje studentane verktøy til å analysere TV-seriar gjennom kjønnsteoretiske perspektiv. Studentane skal utvikle evne til å bruke sentrale teoriar frå feministisk film- og medievitskap, maskulinitetsstudiar og kulturstudiar for å kunne gjere kritiske analysar av serielle forteljingar. Emnet undersøker korleis TV-seriar gjennom forteljing, karakterar og visuelle uttrykk forhandlar spørsmål om kjønn, makt og identitet, og korleis dei inngår i vidare institusjonelle og kulturhistoriske samanhengar prega av skiftande kjønnforståingar. Det blir lagt særleg vekt på sjangrar, praksisar og tematikar der kjønn spelar ei sentral rolle, og på korleis TV-seriar fungerer som ein nøkkelarena for å tenkje om kjønnsrelasjonar og samfunn i vår tid.

Etter fullført emne skal studenten ha oppnådd følgjande læringsutbytte, definert i form av kunnskap, ferdigheiter og generell kompetanse:

Kunnskap

Studenten:

• har kunnskap om korleis kjønn blir representert og forhandla i TV-seriar
• har kjennskap til sentrale teoriar frå feministisk medievitskap, maskulinitetsstudiar og kulturstudiar

Ferdigheiter

Studenten:

• kan analysere TV-seriar kritisk ved hjelp av ulike kjønnsteoretiske perspektiv
• kan vurdere og nytte relevant akademisk litteratur i munnlege og skriftlege diskusjonar

Generell kompetanse

Studenten:

• kan nytte kjønnsteoretiske perspektiv i sjølvstendig arbeid med TV-seriar
• kan halde seg oppdatert på relevant forskingslitteratur og formidle eigne analysar på ein tydeleg måte