Hardingfelebygging 1

Emnet er eit tilbod til studentar som ønskjer fordjuping i hardingfelebygging vidare i studiet. Saman med MOB110 Felemakarhistorie erstattar emnet dei to emna MOB107 og MOB108 for slike studentar på andre år av bachelorstudiet.

Emnet skal utvikle dugleik og kunnskapar i hardingfelebygging. Studieopplegget har opplæring under direkte rettleiing av felemakar som sentralt innhald. Emnet omfattar:

• Materialkunnskap: Bruksområde, emneval, arbeidsmåtar
• Verktøykunnskap
• Arbeidsprosess: Frå emne til ferdig instrument
• Akustiske omsyn: Materialval, avstemming/tilpassing av delar
• Kunnskap om bygging av andre strykeinstrument
• Innføring i bogereparasjon
• Teori: Akustikk og organologi

Studentar som har fullført emnet skal ha følgjande læringsutbyte:

Kunnskapar:

Studenten skal ha grunnleggjande kunnskapar innanfor dei fleste områda av hardingfelebyggjarfaget, inklusive material- og verktøykunnskap, konstruksjonen til andre strykeinstrument, bogereparasjon, akustikk og organologi.

Ferdigheiter:

Studenten skal ha grunnleggjande ferdigheiter innanfor dei fleste områda av hardingfelebyggjarfaget, inklusive material- og verktøybruk, akustiske omsyn og bogereparasjon.

Generell kompetanse:

Studenten skal vise evne til å ta sjølvstendige faglege val på bakgrunn av fagleg rettleiing og litteratur.