Fransk (bachelor)

På bachelorprogrammet i fransk får du innsikt i fransk språkvitskap, franskspråkleg litteratur og kultur og samfunn. Du øver deg i å analysere språklege, litterære og kulturelle fenomen på fransk, og i å forstå andre kulturar frå deira synsvinkel. 

Vi studerer både klassikarar og samtidslitteratur. Vi har prosjekt innanfor narrativitet og økokritikk, fiksjons- og verkelegheitslitteratur, digitale medium, film- og teikneserieadaptasjonar, aldersstudium. 

Du får ei brei innføring i det franske språket og den franskspråklege kultursfæren og lærer å uttrykke deg og formidle kunnskap på munnleg og skriftleg fransk.  

Du får overførbar kompetanse i språk, kultur og tekstfortolking som kan nyttast i vidare studium og arbeidsliv. 

Studiet tar utgangspunkt i at du har forkunnskapar, som til dømes franskundervisning på vidaregåande.

Du studerer på fulltid. Ei typisk veke inneheld forelesingar, seminargrupper og praktiske øvingar i tillegg til sjølvstudium. Du og dine medstudentar blir oppfordra til  å arbeide saman i kollokviegrupper utanom undervisninga. Omfanget av undervisningstimar vil variere frå semester til semester.  

Tidlegare studentar nemner den faglege allsidigheita, med litterær, kulturell og lingvistisk kompetanse, som eit viktig læringsutbytte av studia. Faglege og sosiale arrangement er med på å styrke samhaldet blant studentane. Som student finst det fleire moglegheiter å engasjere seg. 

Som student hos oss vil du ha det meste av undervisninga på Nygårdshøyden midt i Bergen sentrum. Du har tilgang til lesesalar, bibliotek, kollokvierom, treningssenter, kantine, kafear og studentbar på campus. På UiB finn du òg mange ulike studentorganisasjonar. 

Arbeidsgjevarar som opererer internasjonalt treng menneske som beherskar språka og kulturen der dei arbeider. Samfunnet har generelt stor nytte av slik kompetanse, både som kjelde til innovasjon og som motvekt til kulturelle og religiøse misforståingar og fordommar. 

Tidlegare franskstudentar har fått jobb i mange ulike bransjar, som for eksempel i: 

• internasjonale organisasjonar
• media
• handel
• turisme
• kulturliv
• utdanning 

Arbeidsgjevarar framhevar ofte framandspråk som ein ettertrakta kompetanse, fordi det gir  ein heilt annan tilgang til internasjonale marknader. 

Du må dokumentere generell studiekompetanse utan tilleggskrav. Dette er eit krav for opptak til alle studieprogram.

Undervisningsspråk: Norsk og fransk

1. semester   

FRAN100 - Praktisk fransk: språk, litteratur, kultur (10 studiepoeng)  

Examen philosophicum (10 studiepoeng)  

EXFAC00SK - Språk og kommunikasjon (10 studiepoeng)  

2. semester 

FRAN120 - Fransk grammatikk 1 (10 studiepoeng)

FRAN121 - Fransk grammatikk 2 (10 studiepoeng)

FRAN122 - Innføring i moderne franskspråkleg litteratur (10 studiepoeng)  

3. semester 

FRAN123 - Innføring i franske litterære klassikarar (10 studiepoeng)  

FRAN124 - Fransk kulturkunnskap og frankofoni (10 studiepoeng)  

SEK100 - Samanliknande europeiske kulturstudium (10 studiepoeng)  

4. semester 

Frie emne – vel blant alle opne emne ved UiB eller utveksling(30 studiepoeng)   

5. semester 

Frie emne – vel blant alle opne emne ved UiB eller utveksling (30 studiepoeng)   

6. semester 

FRAN204 - Fordjuping i fransk litteratur eller (med bacheloroppgåve) (15 studiepoeng)  

FRAN205 - Fordjuping i fransk grammatikk og tekstlingvistikk eller  (FRAN255 - Fordjuping i fransk grammatikk og tekstlingvistikk med bacheloroppgåve) (15 studiepoeng)  

Du kan dra på utveksling i eitt eller to semester. Du vel blant UiB sine avtalar i heile verda.

Vi organiserer normalt eit opphald for studentane i Det norske studiesenteret ved Universitetet i Caen (OFNEC), med fokus på munnleg og skriftleg fransk. Kurset ved OFNEC er gratis, men studentane må sjølv betale for reise og opphald. Du kan søke Lånekassen om reisestipend.  

Sjå utvekslingsavtalar

Etter avslutta bachelorgrad kan du ta ein mastergrad i fransk lingvistikk og litteratur. I kombinasjon med praktisk-pedagogisk utdanning er du kvalifisert for ei lektorstilling i skolen. Ein mastergrad styrker også moglegheitene til å få jobb.

Etter avslutta mastergrad kan du søke om doktorgradsstipend, og forske på fransk lingvistikk eller litteratur.

Studieplan for Bachelorprogram i fransk