Lærarprofesjonalitet

Emnet har som overordna mål å gje lektorstudentar kunnskap om profesjonalitet i læraryrket og korleis profesjonsteori og vitskapsteori gjev forståing for læraren si heilskaplege rolle i skulen og samfunnet.

For det fyrste vil emnet syne korleis læraryrket kan verte forstått som ein profesjon, kva som ligg i omgrep som profesjonelt ansvar, autonomi og autoritet og kvifor profesjonalitet har vorte både eit fagleg og eit politisk ideal.

Emnet vil, for det andre, utdjupe spørsmålet om profesjonalitet gjennom å gje studentane kjennskap til faglege problemstillingar kring høvesvis profesjonskunnskap, særleg spenningar mellom vitskap, kunnskap og politikk i læraryrket, og profesjonsetikk, særleg i relasjon til lovverk og politisk styring.

For det tredje skal studentane verte introduserte for profesjonell utvikling i læraryrket og i skulen. Emnet vil gjere studentane kjende med variantar av praktikarforsking som reiskap for lærarar si profesjonelle utvikling og med skular sitt arbeid med organisasjonslæring og - utvikling.

Emnet tek sikte på å fremje profesjonalitet og faglegheit som ideal i lektorstudentane sin profesjonelle identitet og øve opp dygder som dømmekraft, integritet og intellektuell nysgjerrigheit.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar:

Studenten

• har grunnleggjande kunnskap om læraren si profesjonelle rolle i samfunnet
• har innsikt i det problematiske forholdet mellom pedagogisk teori og pedagogisk praksis
• har brei kunnskap om pedagogisk teori, vitskapsteori og profesjonsteori, samt koplingar mellom dei
• kjenner til forskingsbaserte modellar for individuell og kollektiv profesjonell utvikling

Ferdigheiter:

Studenten

• kan syne god pedagogisk klokskap og dømekraft i møtet med det komplekse forholdet mellom forsking og pedagogisk praksis
• kan dokumentere og gje uttrykk for eiga profesjonell utvikling, og kunne leggje fram og grunngje utviklingsmål med støtte i teori
• kan identifisere pedagogiske utfordringar og møte desse med støtte i teori og forskingsbasert kunnskap
• kan gjennomføre eit sjølvstendig forskingsprosjekt knytt til eigen praksis
• kan bidra inn i faglege diskusjonar om utøving av lærarprofesjonen

Generell kompetanse:

Studenten

• er i stand til å syne kritisk sans når det gjeld forskingsbasert kunnskap og profesjonsutøvinga sitt forhold til vitskap og politikk
• kan med stor grad av sjølvstende vidareutvikle eigen kompetanse åleine og i samarbeid med andre