Masteroppgåve i spesialpedagogikk

Gjennom arbeidet med masteroppgåva skal studenten dokumentere at vedkommande kan utføre eit sjølvstendig vitskapeleg arbeid under rettleiing, og i tråd med gjeldande forskingsetiske normer. Studenten skal dokumentere kunnskap om sentrale forskingsprinsipp, kunne gjennomføre systematisk og kritisk analyse av problemstillingar og datatilfang, samt kunne framstille saksområdet klart og presist.

Masteroppgåva kan ta form av ein monografi eller ein artikkel med kappe. Uavhengig av form skal masteroppgåva utførleg behandle ei tydeleg definert problemstilling (teoretisk eller empirisk) med relevans for det spesialpedagogiske fagfeltet.

Oppgåvene kan bidra inn i eksisterande forskingsprosjekt fagmiljøet er involvert i eller på andre måtar ta føre seg tema det spesialpedagogiske fagmiljøet definerer som viktige, i dialog med studentane.

Nærare krav til innhald og omfang av masteroppgåva vil bli gjort kjend for studentane ved studiestart.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar

Studenten...

• har kunnskap om og kan kritisk reflektere over forskingsdesign, metode og forskingsetikk
• har kunnskap om og kan kritisk reflektere over teoriar, omgrep og forsking med relevans for masteroppgåva sitt tematiske område

Ferdigheiter

Studenten...

• kan formulere klare problemstillingar og grunngje at desse er fagleg relevante for det spesialpedagogiske feltet
• kan samle, systematisere, analysere, tolke, diskutere og presentere materiale og funn på ein sjølvstendig, nøyaktig, transparent, oversiktleg og etisk forsvarleg måte
• kan grunngje val av metode, teori og litteratur
• kan vise korleis samanfatningar og konklusjonar er i samsvar med teoretiske premiss, problemstillingar og eventuelt empirisk materiale
• kan bruke kjelder, litteratur- og sitattilvisingar på ein korrekt, etisk og oversiktleg måte

Generell kompetanse

Studenten...

• kan formidle fagområdet sin substans og uttrykksform i samsvar med krav for vitskapleg arbeid
• kan utøve fagområdets eigenart innanfor opplærings- og utdanningssektoren