Filosofi og retorikk

Tilhøvet mellom filosofi og retorikk har vore konfliktfylt heilt sidan Platon lot Sokrates gå til åtak på dei såkalla sofistane. Striden mellom filosofi og retorikk heldt fram på ulike måtar gjennom mellomalderen, renessansen og opplysningstida, og er framleis aktuell i vår eige tid. Samstundes er ikkje filosofi og retorikk naudsynleg motsetjingar; i den vestlege intellektuelle tradisjonen har dei ofte spelt på lag, til dømes i undervisninga ved skuler og universiteter. Ein kan òg - med eller utan strid - snakke om filosofiens retorikk og retorikkens filosofi.

RET202 skal gi studentane høve til fordjuping i filosofi og retorikk og tilhøvet mellom dei i eit historisk og teoretisk perspektiv. Dei skal gjere seg kjent med grunnleggjande omgrep og lesa viktige tekstar i både dei filosofiske og dei retoriske tradisjonane. I skriving av semesteroppgåva vert det lagt vekt på korleis ein utformar ein akademisk tekst på ein overtydande måte, og på korleis ein gjev gode tilbakemeldingar på tekstar andre har skrive.

Innhaldet i emnet kan veksle noko frå semester til semester. I tillegg til å leggja opp eit fellespensum i tilknytning til eit overordna tema skal studentane leggja opp eit særpensum med særskilt relevans for semesteroppgåva.

Kunnskap

Etter fullført emne skal studenten ha

• oversikt over nokre sentrale tema i forskingsfeltet filosofi og retorikk
• utdjupande kunnskap om visse problemstillingar innan forskingsområdet

Dugleik

Etter fullført emne skal studenten kunne

• drøfta og gjera greie for filosofiske problemstillingar ved retorisk teori og praksis for eit fagleg og eit allment publikum
• drøfta og gjera greie for retoriske aspekt ved filosofiske tekstar og tema for eit fagleg og eit allment publikum
• arbeida sjølvstendig med problemstillingar i skjæringsfeltet mellom filosofi og retorikk

Kompetanse

I kombinasjon med andre emne og fag kan det gje kompetanse til undervisning i filosofi i ungdomsskulen eller vidaregåande skule. Emnet vil vera godt eigna som støtte til fordjuping i grunnlagsspørsmål i samband med studiet av andre fag.