SDG314 Metodar og prosjektutvikling i tverrfagleg berekraftsforsking

Dette emnet er sett saman av seminar og individuell rettleiing. Målet er å gje støtte til individuell prosjektutvikling og å leggje til rette for at studenten utformar eit masterprosjekt som let seg gjennomføre innanfor normert tid og med dei metodekunnskapane studenten har og tileignar seg i løpet av semesteret. Konkret vert dette arbeidet utvikla gjennom individuelle prosjektskildringar og intensive undervisingsbolkar i utvalde metodar. Metodetilfanget i emnet blir tilpassa etter behov. Emnet gjev også opplæring i forskingsetikk og litteratursøk.

Emnet byggjer på SDG310 Introduksjonsemne: Tverrfaglege tilnærmingar til berekraft og SDG311 Kunnskapsformar.

Studenten skal ved avslutta emne ha følgjande læringsutbytte:

Kunnskapar

Studenten

• har oversikt over relevante forskingsmetodar i berekraftsforsking, på tvers av akademiske kulturar
• har inngåande kunnskap om eit utval forskingsmetodar av særleg interesse for det individuelle masterprosjektet
• har oversikt over forskingsetiske normer og prinsipp

• har inngåande kunnskap om forskingsetiske normer av særleg relevans for det individuelle prosjektet

Ferdigheiter

Studenten kan

• utvikle eit sjølvstendig forskingsdesign på mastergradsnivå

• avgrense, formulere og diskutere eit forskingsproblem, og gjere systematiske søk etter relevant forskingslitteratur
• ta avgjersler knytt til val av teori og metode som er relevant for forskingsproblemet
• planlegge, ta i bruk og kritisk vurdere bruken av eit utval forskingsmetodar av særleg interesse for det individuelle forskingsprosjektet

Ålmenne dugleikar

Studenten kan

• utforme, planlegge og kritisk vurdere ein prosjektdesign
• kritisk vurdere kjelder og akademisk argumentasjon
• omsetje forskingsetiske normer og prinsipp i praksis, inkludert handtering av personvern