Rasjonalitet og politisk åtferd

Dette kurset nyttar teoretiske modellar og empiriske funn frå statsvitskap og åtferdsøkonomi for å forklare politisk åtferd. Kurset tek utgangspunkt i ei sentral spenning: den mellom dei klassiske føresetnadene i teoriar om rasjonelle val og empiriske funn frå eksperimentell åtferdsforsking.

Kurset gjev analytiske verktøy for å forstå politisk åtferd gjennom sentrale spørsmål som: kva som formar preferansar for omfordeling av gode, kvifor nokre vel å stemme medan andre ikkje gjer det, korleis medianveljar-teoremet forklarar partikonkurranse, og korleis oppfatningar om rettferd påverkar politiske haldningar.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar:

Studenten...

• kan gjere greie for metodologisk individualisme som vitskapsfilosofisk fundament for teoriar om rasjonelle val.
• forstår sentrale formale modellar for politisk åtferd.
• kan gjere greie for sentrale teoriar om fordelingsrettferd.
• kan gjere greie for empirisk forsking på tema som veljaråtferd og rettferdspreferansar.
• kan forklare korleis omsyn til rettferd utfordrar og kompliserer klassiske modellar for rasjonelle val.

Ferdigheiter:

Studenten kan...

• nytte formale modellar frå rasjonell val-teori for å analysere konkrete politiske fenomen.
• identifisere og kritisk vurdere dei sentrale føresetnadene som ligg til grunn for formale modellar for politisk åtferd.
• drøfte og samanlikne prediksjonar frå rasjonell val-teori med empiriske funn frå åtferdsforsking.
• nytte sentrale rettferdsteoriar og funn frå forsking på rettferdspreferansar for å analysere og forklare politiske haldningar og åtferd.

Generell kompetanse:

Studenten kan...

• nytte teoretisk innsikt til å reflektere kritisk over aktuelle politiske hendingar og samfunnsdebattar.
• forstå og vurdere korleis teoretiske modellar forenklar komplekse sosiale fenomen, og kjenne att både styrkane og veikskapane ved slike forenklingar.
• syne evne til sjølvstendig og kritisk tenking om politisk åtferd og dei mekanismane som formar ho.
• formidle faglege analysar og teoretiske resonnement på ein klar og presis måte.