Russisk (bachelor)

Nokre av spørsmåla vi diskuterer på bachelorprogrammet i russisk, er: 

• Kva er vilkåra for kulturen og sivilsamfunnet i Russland i dag?
• Kva historisk rolle har Russland hatt som imperium og kolonimakt?
• Kva er samanhengane mellom utviklinga i samfunnet og utviklinga i språket, litteraturen og kulturen? 

Du lærer å forstå, snakke og skrive russisk, og å omsette mellom norsk og russisk. Du får bruke digitale hjelpemiddel, og kan dermed bruke kyrillisk både som handskrift og på tastatur. 

Du fordjupar deg i særskilt i russisk, men også i ukrainsk og europeisk kultur, samfunn og historie. I tillegg utformar du sjølvstendige tekstar på norsk og russisk og utviklar evnene dine til kritisk refleksjon og strukturert formulering av skriftlege arbeid. 

Dette bachelorprogrammet er eit fulltidsstudium. Ei typisk veke kan innehalde:

• førelesingar
• seminargrupper
• studentaktive undervisningsformer
• sjølvstudium - i grupper eller individuelt, litt etter korleis du likar å jobbe

På dette studiet får du tett oppfølging og mykje undervisning dei første semestera. Du vert del av eit relativt lite - men hyggeleg - miljø, og kjem i god kontakt med andre studentar på faget. Studentane har tilgang til lesesalar på Sydneshaugen skole og dei  kan booke eigne rom om dei ønsker å jobbe i grupper.

Som student hos oss vil du ha det meste av undervisninga på Nygårdshøyden midt i Bergen sentrum. Du har tilgang til lesesalar, bibliotek, kollokvierom, treningssenter, kantine, kafear og studentbar på campus. På UiB finn du òg mange ulike studentorganisasjonar. Å vere med i ein studentorganisasjon er ei verdifull investering i studietida di.

Med utdanning i russisk får du innsikt i russisk historie, samfunn, litteratur og kultur, og ferdigheiter i russisk språk. Du får også kunnskapar om Ukraina si historie og kultur, samt kompetanse i kulturforståing og sjølvstendig refleksjon, noko som gjer deg attraktiv for ei rekke arbeidsgjevarar. 

Nokre aktuelle arbeidsplassar kan vere: 

• forlagsbransjen, til dømes som omsettar eller anmeldar
• diplomatiet, til dømes på aspirantkurset til Utanriksdepartementet
• departementa, til dømes som tolk, konsulent eller rådgjevar
• forsvaret
• media, til dømes som journalist eller korresponden

Du må dokumentere generell studiekompetanse utan tilleggskrav. Dette er eit krav for opptak til alle studieprogram.

Undervisningsspråk: Norsk og russisk

Norsk og russisk

Bachelorprogrammet i russisk er eit treårig fulltidsstudium, som startar i august.     

Slik er studiet lagt opp:

1. semester  

Grunnkurs i skriftleg og munnleg russisk (10 studiepoeng) dersom du ikkje kan dokumentere forkunnskap i russisk   

Examen philosophicum, vel enten seminarmodell eller skulemodell (10 studiepoeng)  

Les og skriv (10 studiepoeng)  

2. semester 

Russisk språk I (20 studiepoeng)  

Russisk historie og kultur (10 studiepoeng)  

Sommarkurs i russisk språk i utlandet er anbefalt   

3. semester 

Russisk språk II (10 studiepoeng)  

Ukraina: historie, samfunn, litteratur(10 studiepoeng)  

Samanliknande europeiske kulturstudium (10 studiepoeng)   

4. semester  

Frie emne – vel blant alle opne emne ved UiB eller utveksling (30 studiepoeng) 

5. semester  

Frie emne – vel blant alle opne emne ved UiB eller utveksling (30 studiepoeng)

6. semester  

Russisk språk og språkvitskap (15 studiepoeng)  

Russisk litteratur (15 studiepoeng, bacheloroppgåve)  

Eit utanlandsopphald gir deg verdifull kulturell erfaring, språkleg trening, ny fagleg innsikt og opplevingar for livet. Det er lagt til rette for for eit intensivt språkkurs i utlandet etter andre semester og eit utvekslingsopphald i utlandet i fjerde semester.

Sjå utvekslingsavtalar

Etter fullført bachelorprogram kan du ta ein mastergrad i russisk ved UiB for å fordjupe deg meir i russisk språk, kultur, litteratur eller samfunn.

Studieplan for Bachelorprogram i russisk