Samfunnsøkonomi (årsstudium)
Samfunnsøkonomi handlar om korleis individ, bedrifter, styresmakter og nasjonar tar og bør ta avgjersler om bruk og fordeling av samfunnets ressursar. Faget gir deg ein metode til å forstå og analysere komplekse samfunnsutfordringar.
- Varigheit
- 1 år
- Studieplassar
- 23
- Studiepoeng
- 60
- Studiestart
- Haust
- Undervisningsspråk
- Norsk
Kva lærer du?
Du får ei grunnleggande innføring i
- samfunnsøkonomi som fag
- mikro- og makroøkonomi
- metode for samfunnsøkonomiske analysar og matematikk for økonomar, statistikk og økonometri
Studiekvardag
Årsstudiet i samfunnsøkonomi er eit studium på fulltid. Det vil seie at du bruker om lag like mykje tid på studia som på ein full jobb. Du tar 30 studiepoeng kvart semester. I tillegg til sjølvstudium som lesing og kollokviegrupper har du undervisning i form av forelesingar og seminargrupper. Undervisninga og litteraturen er på norsk og engelsk.
Som samfunnsøkonomistudent høyrer du til Det samfunnsvitskaplege fakultet (SV). Du finn lesesalplassar i Ulrike Pihls hus og på SV-biblioteket. Mesteparten av undervisninga vil vere i Ulrike Pihls hus og SV-bygget.
Kva kan du jobbe som?
Samfunnsøkonomar arbeider ofte med analyse- og utgreiingsoppgåver, innan forsking og undervisning, som valutahandlarar eller innan formuesforvaltning i finansinstitusjonar.
Opptakskrav og søknadsfrist
I primær kvote tel berre karakterpoeng og realfagspoeng/språkpoeng. Søkarar som ikkje fyller meir enn 21 år i opptaksåret og har eit førstegongsvitnemål, søker i denne kvota.
I ordinær kvote tel også forbetringar av fag, alderspoeng og tilleggspoeng. Du søker i alle kvotane du er kvalifisert for.
Du må dokumentere generell studiekompetanse utan tilleggskrav. Dette er eit krav for opptak til alle studieprogram.
Undervisningsspråk
Undervisningsspråk: Norsk
Studiets oppbygging
Årsstudium i samfunnsøkonomi varar i eitt år (to semester) og startar i august. Årsstudiet svarar til det første året av bachelorprogrammet i samfunnsøkonomi.
Slik er studiet bygd opp:
1. semester
ECON100 – Innføring i samfunnsøkonomi (10 studiepoeng)
ECON140 – Matematikk for økonomer (10 studiepoeng)
Valemne innan samfunnsøkonomi (10 studiepoeng)
2. semester
ECON110 – Mikroøkonomiske grunnomgrep og marknadsteori (10 studiepoeng)
ECON130 – Makroøkonomi (10 studiepoeng)
ECON240 – Statistikk og økonometri (10 studiepoeng)
Utveksling
Det er ikkje mogleg å reise på utveksling på årsstudium.
Vidare studiemoglegheiter
Årsstudiet er ikkje eit grads- eller vitnemålsgivande studium, men det kan inngå som del av ein bachelor i samfunnsøkonomi. Du kan søke om intern overgang dersom du vil studere meir. Etter du har fullført bachelorgraden, kan du bygge på med ein master i samfunnsøkonomi.
Spørsmål om studiet?
Studieplan
Ein studieplan er eit formelt dokument mellom deg som student og Universitetet i Bergen. Studieplanen skal gi tydelege rammer for studiet, beskrive læringsmåla du skal oppnå og korleis studiet er bygd opp.
