Praktisk-pedagogisk utdanning - PPU (årsstudium)

PPU er ein eittårig lærarutdanning som består av pedagogikk, fagdidaktikk og praksis i skulen. 

Det viktigaste du lærer er å undervise, å ivareta elevane og å sjå og verdsetje kvar og ein av dei. Med denne utdanninga får du blant anna: 

• kunnskap om korleis du leier og legg til rette for god fagleg og sosial læring
• kunnskap om korleis du planlegg, gjennomfører og reflekterer over undervisning basert på forsking og erfaring
• lære om korleis du bygger gode relasjonar til elevar og føresette, og å samarbeide med aktørar som er relevante for skoleverket
• kunnskap om korleis vi kan ivareta mangfaldet i skolen og i den enkelte elevgruppa 

PPU er eit fulltidsbasert campusstudium. Studiet kan ikkje takast som fjernstudium, da mykje av undervisninga legg opp til obligatorisk oppmøte. I pedagogikkemna har du vanlegvis to seminar og to forelesingar i veka, utanom praksisperiodane. Seminara er obligatoriske. I fagdidaktikkemna vil arbeids- og undervisningsformene variere etter kva emne du tar. Her vil også omfanget av obligatorisk undervisning variere. 

Du har 30 dagar obligatorisk praksisopplæring ved ein skole begge semestera, vanlegvis både på ungdomstrinnet og i vidaregåande skole. Du får tildelt praksisplass. 

Denne utdanninga er utfordrande og arbeidskrevjande, men samtidig veldig lærerik. Gjennom undervisninga, oppgåvearbeid og praksis blir du godt kjent med medstudentane dine. Du får tett oppfølging av engasjerte fagpersonar, både i undervisninga og i praksisopplæringa. 

Med fullført PPU er du kvalifisert til å undervise frå 5. til 13. trinn i skulen. Studiet er særleg retta mot arbeid i ungdomsskulen og vidaregåande opplæring, inkludert vaksenopplæringa.  

Det er eit stort behov for kvalifiserte lærarar i norsk skole. Yrket gir jobbmoglegheiter over heile landet.

Utdanninga opnar òg for andre yrkesvegar der kombinasjonen av formidlingskompetanse og pedagogisk kompetanse er attraktiv. 

Sjå meir om moglege jobbar her.

Du må dokumentere generell studiekompetanse utan tilleggskrav. Dette er eit krav for opptak til alle studieprogram.

For opptak krev ein følgjande:
- Fullført mastergrad
eller
- Fullført bachelorgrad og minst to års relevant arbeidserfaring frå skulen. Dette unntaket frå krav om mastergrad gjeld til og med opptaket hausten 2029.

I tillegg må søkar ha:
- Fagleg fordjuping i minst eitt undervisningsfag som UiB tilbyr fagdidaktikk i
- Minimum 60 studiepoeng i det enkelte faget
- Eit karaktersnitt på minst C (2,5) i faget/faga som utgjer opptaksgrunnlaget. Karakersnittet blir rekna ut på grunnlag av det 60 studiepoenga som gir opptak
- Kompetanse i norsk tilsvarande generell studiekompetanse (ekstern lenke)

Her finn du utfyllande informasjon om opptakskrav til PPU (ekstern lenke) og korleis du søker opptak til studiet (ekstern lenke).

Vi gjer merksam på at studiet startar måndag i veke 33 og at oppmøte første veka er obligatorisk.

Ved opptak til studiet må du legge fram politiattest.

Undervisningsspråk: Norsk

PPU er eit eittårig fulltidsstudium på 60 studiepoeng som inneheld pedagogikk, fagdidaktikk og praksis i skulen.

1. semester 

PEDA101 - Praktisk pedagogikk - pedagogikk 1. semester (15 studiepoeng) 

Fagdidaktikk (15 studiepoeng)  

PPUPRA101 - Praksis PPU 1. semester 

2. semester    

PEDA102 - Praktisk pedagogikk - pedagogikk 2. semester (15 studiepoeng) 

Fagdidaktikk (15 studiepoeng) 

PPUPRA102 - Praksis PPU 2. semester 

Det er ikkje mogleg å reise på utveksling på denne utdanninga. 

Etter å ha fullført praktisk-pedagogisk utdanning kan du bygge på og få undervisningskompetanse i andre fag. Det finst òg moglegheiter for etter- og vidareutdanning, blant anna innan spesialpedagogikk, skoleleiing og kollegarettleiing.

Studieplan for Praktisk-pedagogisk utdanning