Kommunikasjon og språk i felt

I dette semesteret skal studenten utføre eit opphald på 3-4 månader ved ein språkskule i eit arabisktalande land kor undervisningsmetoden er såkalla kommunikativ språklæring. Dette betyr at undervisninga stort sett er på arabisk og studenten får mengdetrening i lesing, skriving, lytting og snakking. Emnet er meint å spesielt auke ferdigheitene i lytting og snakking i moderne standardarabisk og vald dialekt, men vidare arbeid med tekstar på standardarabisk er og en del av emnet. Studenten vert eksponert for arabisk språk og kultur utanfor språkskulen og får førstehandskjennskap til dette. Studenten får tid til, og blir sterkt oppfordra til, å ta del i lokale aktivitetar utanfor språkskulen som kan fremme språklæring.

For optimal utnytting av emnet og for å oppnå ferdigheitsmåla er det avgjerande at studenten aktivt oppsøkjer autentiske språksituasjonar utanfor språkskolen som svarer til hennar/hans behov, ønskjer og motivasjon.

Arabisk blir på ulike språkskular i den arabisktalande verda ofte undervist med arabisk grammatisk terminologi og med andre metodar enn studenten er van til og studenten får eit medvite forhold til korleis best nyttiggjere seg ulike tilgjengelege språklæringstilbod etter gjennomført kurs på språkskulen.

Studenten skal også følge opp eigen språklæring på og utanfor språkskulen på ein bevisst og sjølvkritisk måte og reflektere over dette i eit refleksjonsnotat.

Nærmare informasjon om utreisesemesteret finn du i Mitt UiB på programsiden.

Studenten skal ved avslutta emne ha følgjande læringsutbyte:

Kunnskap

Studenten

• får ein betydeleg mengdetrening i lesing, skriving, lytting og snakking på arabisk.
• får personleg erfaring med det å møta arabisk språk, samfunn og kultur i autentiske situasjonar.
• får erfaring frå språklæring i kommunikative og tradisjonelle former for arabiskundervisning og lærer grammatikk og språkkunnskap med arabisk terminologi.

Ferdigheiter

Studenten

• oppnår eit mellomnivå i lesing, skriving, lytting og snakking, til dels på dialekt eller blanding av standardarabisk og dialekt.
• kan utvida ordforrådet sitt og forståing i moderne standardarabisk og vald arabisk dialekt (eller kombinasjonar av desse) gjennom opphald i autentiske omgivnadar.

Generell kompetanse

Studenten

• kan evaluere og reflektere over eigen motivasjon, språklæring og individuelt tilpassa språklæringsstrategiar.
• har personleg erfaring frå møte med arabisk samfunn og kultur.
• er førebudd til seinare språk-feltarbeid og språkskuleopphald for vidare utvikling av språkkunnskapane etter gjennomført grad.