Studieplan for BAHF-ITAL Bachelorprogram i italiensk, vår 2026
Omfang og studiepoeng
Bachelorprogrammet i italiensk har eit omfang på 180 studiepoeng og er normert til 3 år.
Namn på grad
Bachelor i italiensk
Fulltid/deltid
Fulltid. Om du vil ta heile eller delar av studiet som eit 50% deltidsstudium, kan du vende deg til studierettleiar.
Undervisningsspråk
Undervisningsspråket på italienskemna er italiensk og norsk.Sjå den einskilde emneplanen for emna som inngår i programmet.
Studiestart - semester
Haust
Mål og innhald
Bachelorstudium i italiensk har som mål å gje generelle og spesialiserte kunnskapar i italiensk språk og italienskspråkleg litteratur og kultur. Gjennom studiet av pensum og bruk av ulike læringsformer, skal ein tileigne seg god praktisk dugleik i munnleg og skriftleg italiensk, samstundes som ein utviklar ei sjølvstendig haldning til stoffet. Studentane skal på bachelornivå dessutan skaffe seg ein viss kjennskap til italiensk språk- og litteraturvitskap og til italienske kulturtilhøve i vid tyding.I italienskstudiet heng språk- og litteraturstudia nøye saman.
Italiensk, som høyrer til dei romanske språka og altså går attende til latin, vert tala av oppunder 60 millionar menneske. Det er nasjonalspråk i Italia, og italiensk er eitt av dei fire offisielle språka i Sveits, der særleg kantonen Ticino er italienskspråkleg. Italiensk er berar av ein særs rik kultur som gjennom tidene har gjeve djuptgripande impulsar til resten av Europa og verda i det heile. I vår tid spelar Italia ei sentral rolle så vel kulturelt som politisk og økonomisk.
Bachelorgraden i italiensk inneheld òg ein breiddekomponent, som betyr at studiet i italiensk blir kombinert med minst eitt anna fagområde. Studentar vel fritt kva breiddekomponenten skal innehalde. Breidde i utdanninga gir studentane innsikt i fagområde utanfor eiga spesialisering. Dette breie faglege grunnlaget fremmar kritisk tenking, kreativitet og fleksibilitet - eigenskapar som er verdifulle både i vidare studium og i arbeidslivet.
Læringsutbyte
Kandidaten skal ved avslutta program ha føljande læringsutbyte definert i kunnskapar, dugleikar og generell kompetanse:
Kunnskapar:
Kandidaten
- har brei generell kunnskap om sentrale tema, teoriar, problemstillingar, prosessar, verktøy og metodar innan italiensk språk, litteratur og kultur- og samfunnstilhøve
- har kjennskap til forskings- og utviklingsarbeid innanfor faget
- er i stand til å oppdatere kunnskapen sin innanfor fagområdet
- har god innsikt i italiensk språk- og litteraturvitskap
- har inngåande kjennskap til eit representativt utval litterære tekstar
- har tileigna seg dei språkkunnskapar som trengst for å skjøne dei litterære verka
Dugleik:
Kandidaten
- kan bruke moderne italiensk skriftleg og munnleg
- kan arbeide sjølvstendig med problemstillingar på grunnlag av faglege kunnskapar
- kan skjøne og bruke moderne italiensk munnleg og skriftleg i prosjektbaserte arbeid
- kan bruke kunnskapane sine kritisk og reflektere over eigen fagleg praksis innanfor:
a) grammatikk
b) språkleg variasjon
c) litteraturvitskaplege metoder
- kan gå vidare med eiga kompetanseutvikling og spesialisering på ein sjølvstendig måte innanfor begge disiplinane
- har bygd opp ei sjølvstendig og reflekterande haldning til stoffet
Generell kompetanse:
Kandidaten
- har skaffa seg nok kunnskap og innsikt til å dra nytte av vekselspelet mellom dei to disiplinane språk og litteratur
- kan nytte kombinasjonen av fag i spesialiseringa i italiensk og frie studiepoeng i vidare utdanning eller yrkesplanar
- kan formidle sentralt fagstoff som teoriar, problemstillingar og løysingar både skriftleg, munnleg og gjennom andre relevante uttrykksformer
Opptakskrav
Generell studiekompetanse eller realkompetanse.
Tilrådde forkunnskapar
Ein rår til at studentane i tillegg til generell studiekompetanse har forkunnskapar i italiensk som svarar til høgste nivå frå vidaregåande skole, ITAL001 Innføring i italiensk språk, ITAL100 Innføring i italienskstudium eller tilsvarande.
Innføringsemne
Det er sterkt tilrådd å ta desse emna første semester:
- EXPHIL Examen philosophicum (10 studiepoeng)
- EXFAC00SK Språkkunnskap (10 studiepoeng)
- ITAL100 Innføring i italiensk (10 studiepoeng)
For nokre studentar, til dømes studentar som allereie har tatt eitt eller fleire av desse emna, kan det vere ønskjeleg å byte dei ut med adre emne. I slike høve er det viktig å ta kontakt med studierettleiar.
Obligatoriske emne
Ex.phil. Examen Philosophicum (haustemne, 10)
Vel eitt av desse to innføringsemna:
Grunnemne
ITAL121 Italiensk språk I (våremne, 10 stp.)
ITAL125 Moderne italiensk kortprosa (våremne, 10stp.)
ITAL133 Medier og italiensk samtidskultur (våremne, 10stp.)
ITAL122 Italiensk litteratur (haustemne, 10stp.)
ITAL124 Italiensk språk 2 (haustemne, 10stp.)
SEK100 Samanliknande europeiske kulturstudium (haustemne, 10stp.)
Fordjupingsemne
Det er krav i graden om å skrive eit sjølvstendig og rettleia akademisk arbeid. Vel kva for fagdisiplin du vil skrive bacheloroppgåva i, anten i emnet, ITAL255 Eldre italiensk litteratur med bacehloroppgåve (våremne, 15 stp.) eller i emnet, ITAL253 Italiensk språk og lingvistikk med bacheloroppgåve (våremne, 15stp.).
Det er óg obligatorisk med fordjupning. Du må fordjupe deg i den disiplinen du ikkje vel å skrive bacheloroppgåva i, altså anten i:
ITAL203 Fordyping i italiensk språk og lingvistikk (våremne, 15stp.)
ITAL205 Fordypning i eldre italiensk litteratur (våremne, 15 stp.)
Bachelorprogrammet i italiensk har ein obligatorisk breiddekomponent på 30 studiepoeng. Dette vil seie at studentar må ta minst 30 studiepoeng med emne utanfor italienskfaget. Dette er jf. HF sine utfyllande reglar til § 10-3 i UiB si studieforskrift.
Spesialisering
Spesialiseringa i italiensk er på 90 studiepoeng (stp.) og omfattar seks grunnemne (100-nivå) og to emne på fordjupingsnivå (200-nivå):
Grunnemne
ITAL121 Italiensk språk I (våremne, 10 stp.)
ITAL122 Italiensk litteratur (haustemne, 10 stp.)
ITAL133 Medier og italiensk samtidskultur (våremne, 10 stp.)
ITAL124 Italiensk språk II (haustemne, 10 stp.)
ITAL125 Moderne italiensk kortprosa (våremne, 10 stp.)
SEK100 Samanliknande europeisk kulturstudium (haustemne, 10 stp.)
Fordjuping
Studenten vel å skrive bacheloroppgåva i ein av to fagdisiplinar, anten i italiensk språk og lingvistikk (ITAL253) eller i italiensk litteratur (ITAL255). Studenten må fordjupe seg i ein annan disiplin. Ein kan til døme ikkje skrive bacheloroppgåve og fordjupe seg i same fagdisiplin.
ITAL203 Fordypning i italiensk språk og lingvistikk (våremne, 15 stp.)
ITAL253 Italiensk språk og lingvistikk med bacheloroppgåve (våremne, 15 stp.)
ITAL205 Fordypning i eldre italiensk litteratur (våremne, 15 stp.)
ITAL255 Eldre Italiensk litteratur med bacheloroppgåve (våremne, 15 stp.)
Tilrådde valemne
I tillegg til ex.phil., innføringsemne og spesialiseringa inneheld programmet 70 frie studiepoeng. Merk at introduksjonsemnet ITAL100 Innføring i italienskstudium, reknast med i dei frie studiepoenga.
I dei frie studiepoenga kan studenten velje emne som er relevante for studenten si vidare utdanning eller yrkesplanar. Ta gjerne kontakt med studierettleiar om tilrådde valemne.
30 av dei 60 frie studiepoenga må brukast til å oppfylle kravet om breiddekomponent (sjå under «Obligatoriske emne»).
Rekkefølgje for emne i studiet
Tilrådd rekkjefølgje for emne i studiet:
1. semester (haust):
EXPHIL Examen philosophicum (10 stp.)
EXFAC00SK Språkkunnskap (10 stp.)
ITAL100 Innføring i italienskstudium (10 stp.)
2. semester (vår):
ITAL121 Italiensk språk I (10 stp.)
ITAL125 Moderne italiensk kortprosa (10 stp.)
ITAL133 Medier og italiensk samtidskultur (10 stp.)
3. semester (haust)
ITAL122 Italiensk litteratur (10 stp.)
ITAL124 Italiensk språk II (10 stp.)
SEK100 Samanliknande europeiske kulturstudium (10 stp.)
4. semester (vår)
Ta emne i andre fag som frie studiepoeng i graden. Du kan gjere det same i utlandet gjennom å reise på utveksling til et universitet til døme i Italia (30 stp.).
For å oppretthalde kontinuitet i italienskopplæringa tilrår vi å ta 200-nivå i det 4. semesteret. Studentar som derimot tek frie studiepoeng i eit fag med oppstart på våren, utsett og tek 200-nivå i det 6. semesteret.
5. semester (haust):
Ta emne i andre fag som frie studiepoeng i graden. Du kan gjere det same i utlandet gjennom å reise på utveksling til et universitet til døme i Italia (30 stp.).
6. semester (vår):
- Val av bacheloroppgåve. Få rettleiing og skriv oppgåva anten i emnet; ITAL253 Italiensk språk og lingvistikk med bacheloroppgåve (15 stp) eller i ITAL255 Eldre italiensk litteratur med bacheloroppgåve (15 stp).
Fordjup deg i ein fagdisiplin som ikkje er den same som du skriv bacheloroppgåva i. Vel mellom ITAL253 Fordjuping i italiensk språk og lingvistikk (15 stp.) eller ITAL255 Fordjuping i eldre italiensk litteratur (15 stp.).
Studentar kan sjølv velje om dei vil følgje det tilrådde løpet eller om dei vil byte om på rekkjefølgja av spesialisering og frie studiepoeng. Ein må då vere merksam på at italienskemna har faste undervisningssemester. Det er uansett tilrådd at ein fullfører 100-nivå i italiensk før ein tek fatt på 200-nivået.
Delstudium i utlandet
Eit utvekslingsopphald ved eit italienskspråkleg universitet er ein forventa og fagleg tilrådd del av studiet. Utvekslinga går normalt føre seg i det femte eller sjette semesteret. Ein kan òg velje å vere på utveksling eit heilt år.
Tilrådde utvekslingsstader finn ein på nettsida til studieprogrammet: www.uib.no/studieprogram/BAHF-ITAL.
Ein kan òg velje frå Universitetet i Bergen sine avtaler med studiestader i heile verda. All informasjon om utveksling finn ein på www.uib.no/utveksling.
Arbeids- og undervisningsformer
Gjennom ulike undervisingsformer får studentane høve til å studere og nærme seg faget på ulike måtar. Undervisninga er forskingsbasert og føreset aktiv deltaking frå studentane.
Arbeidsmetodar og undervisingsformer kan vere førelesingar, seminar, gruppearbeid, skriftlege og munnlege presentasjonar, omgreps- og problemfokuserte oppgåver, problembasert læring, rettleiing og praktisk bruk av digitale verktøy.
For nærare informasjon, sjå dei einskilde emneplanane.
Vurderingsformer
Gjennom studiet møter studentane ulike vurderingsformer. Til dømes skriftleg skuleeksamen, rettleidd oppgåve, heimeeksamen, munnleg presentasjon, munnleg prøve og mappevurdering.
Vurderingsformene er tilpassa læringsutbyttet i dei ulike emna.
For nærare informasjon om vurderingsformer, sjå dei einskilde emneplanane
Vitnemål og vitnemålstillegg
Vitnemål blir skrive ut etter at graden er fullført.
Karakterskala
Ved sensur av emna i programmet kan det bli nytta ein av to karakterskalaer:
- A-F, der F er stryk
- Greidd/ikkje greidd
Grunnlag for vidare studium
Med eit karaktersnitt på C i spesialiseringa kvalifiserer programmet for opptak til masterprogram i italiensk ved UiB.
Studentar som planlegg å ta PPU, må sørge for å få dekka opptakskrava i løpet av studiet sitt. Informasjon finn ein på www.uib.no/studieprogram/PRAPED
Relevans for arbeidsliv
Gode kunnskapar i italiensk språk og kultur er etterspurde innanfor visse segment av næringsliv, informasjonsarbeid, media, omsetjing og kulturliv. Italia er ein viktig handelspartnar for Noreg. Turistnæringa er òg svært viktig for begge landa. Noreg er eit populært reisemål for italienske turistar, og potensialet for vidareutvikling er stort. Italienskstudiet, kombinert med eit anna skulefag og praktisk-pedagogisk utdanning, kvalifiserer for undervisning innanfor skuleverket.
Evaluering
Bachelorprogrammet blir kontinuerleg evaluert i tråd med retningslinene for kvalitetssikring ved UiB. Emne- og programevalueringar finn ein på kvalitetsbasen.uib.no.
Skikkavurdering og autorisasjon
Programmet har ikkje krav om skikkavurdering eller autorisasjon.
Programansvarleg
Programstyret har ansvar for fagleg innhald og oppbygging av studiet og for kvaliteten på studieprogrammet.
Administrativt ansvarleg
Det humanistiske fakultet gjennom Institutt for framandspråk har det administrative ansvaret for studieprogrammet.
Kontaktinformasjon
Tlf 55 58 93 70